-Пiк вяселляў у жніўні прыйшоўся на апошнія выходныя лета. 29 жніўня ў Мар'інай Горцы распісаліся шэсць пар. Былі ў гэты дзень і маладыя ў Рудзенскiм сельвыканкаме, - адзначае начальнік аддзела загс райвыканкама Наталля Дубовік. - Самай юнай нявесце жніўня споўнілася 16 гадоў, жаніху - 19. Самым узроставым жаніхом быў 60-гадовы пухаўчанiн, самай старэйшай нявесце споўнілася 54 гады. У сярэднім маладыя людзі жаніліся у 31 год, дзяўчаты выходзілі замуж у 27 гадоў.
Прыкладна такі ж сярэдні ўзрост у пухаўчан, якія ў жніўні сталі бацькамі. У апошні летні месяц у нашым раёне з'явілася на свет 46 малых. Хлопчыкаў нарадзілася больш - 24 . Самыя папулярныя імёны Данііл (3), Максім і Яраслаў (па 2). Рэдкія імёны - Гардзей, Данiслаў і Роберт.
Дзяўчынак часцей за ўсё называлі Марыяй (3), Алісай і Васілісай (па 2). У ліку рэдкіх жаночых імёнаў - Афіна, Мія і Марыяна.
Першынца дачакаліся ў пятнаццаці сем'ях, другога дзіцяці - у шаснаццаці. У Свіслацкім сельвыканкаме зарэгістраваная адна двойня. Шматдзетнай сям'ёй пасля нараджэння трэцяга дзіцяці сталі трынаццаць сем'яў раёна. У адной сям'і нарадзілася шостае дзіця.
З пачатку года ў раёне зарэгістравана 379 нараджэнняў і 203 шлюбы. У мінулым годзе за гэты ж перыяд было 365 нараджэнняў і 217 шлюбаў.
Сёння органы загс ажыццяўляюць пятнаццаць адміністрацыйных працэдур. Работнікі органаў загс падзяляюць з людзьмі не толькі радасныя падзеі, але і смутку. У жніўні ў раёне зарэгістравана 84 смерці, з пачатку года 710.
Кацярына Вернікоўская.