Стужачку пераразаюць Сяргей Лапановiч і Алена Чаратаева.
Пропісы бяспекі і тэматычныя расклады заняткаў - з гэтых падарункаў для першакласнікаў Мар'інагорскай гімназіі пачаўся навучальны год. Уручыў іх Сяргей Лапановiч, начальнік Мінскага абласнога ўпраўлення МНС.
Падарунак ў Дзень ведаў атрымалі ўсе жыхары нашага горада. 1 верасня каля ФАК «Аквамарын» па ініцыятыве Пухавіцкага РАНС быў адкрыты новы арт-аб'ект - лаўка тэматычная. Увасобіў ідэю ў жыццё індывідуальны прадпрымальнік Аляксей Шалавiла.
- Стварэнне арт-аб'екта заняло прыкладна тыдзень, - распавядае Аляксей. - Гэта быў па-сапраўднаму творчы працэс, бо важна было арганічна размясціць каля лаўкі пажарную калонку і ручныя ствалы. Атрымалася ці не, судзіць пухаўчанам.
Для аўтара гэта дэбютны арт-аб'ект на пажарную тэматыку, аднак не першая падобная праца. Лаўка для закаханых каля аддзела загс райвыканкама, аўтамабіль каля ГД «Трыа», лаўкі на цэнтральнай плошчы горада - гэта не поўны спіс аб'ектаў, над якімі працаваў Аляксей.
Ва ўрачыстай цырымоніі прынялі ўдзел Сяргей Лапановiч і дырэктар ДЮСШ алімпійскага рэзерву Алена Чаратаева. Сяргей Лапановiч пахваліў працу майстра і адзначыў, што падобныя арт-аб'екты з'яўляюцца адным з напрамкаў прафілактыкі. Удзельнікі цырымоніі адкрыцця паспяшаліся першымі зрабіць памятнае фота ля новай лаўкі.
Кацярына Вернікоўская.