Пасёлак Дружны ў сераду прыняў эстафету абласной маладзёжнай акцыі «Мая Радзіма! Мая Беларусь!». Маштабнае мерапрыемства пад слоганам «Моладзь Міншчыны - за будучыню краіны» прайшло на пляцоўцы насупраць Дружненскага СДК.
Тут разгарнуліся гандлёвыя рады, выстава вырабаў майстроў Пухаўшчыны. Самыя маленькія жыхары Дружнага аблюбавалі надзіманыя горкі, батуты і атракцыёны. Тыя, хто старэйшы, займалі месцы бліжэй да сцэны і падпявалі артыстам. Сваімі выступамі дружненцаў парадавалі прадстаўнік Беларусі на конкурсе «Еўрабачанне-2014» Тэа, спявачка Алена Грышанава і кавергрупа «OK-BAND».
Варта сказаць, што задоўга да запрошаных выканаўцаў выдатны музычны настрой землякам стварылі артысты Дружненскага СДК і гурт «24».
Упрыгожыў свята патрыятычны флэшмоб. Каларыту святу дадалі прадстаўнікі РК ГА «БРСМ» і раённага аб'яднання прафсаюзаў, якія прыкметна вылучаліся сваёй яркай сімволікай.
Завяршылася акцыя маштабным святочным салютам, які прыйшлі паглядзець многія жыхары пасёлка.