Пачалося свята з урачыстага ўскладання кветак на Алеі Славы, затым галоўнай пляцоўкай быў парк у Новай Зары. За стараннасць і дасягнутыя поспехі ў службе лепшых афіцэраў і прапаршчыкаў узнагародзілі Граматамі, нагруднымі знакамі «За бездакорную службу ў сілах спецыяльных аперацый». Узнагароды вайскоўцам уручыў намеснік камандуючага сіламі спецыяльных аперацый Узброеных Сіл палкоўнік Аляксей Папоў, які з 2014 па 2017 год камандаваў брыгадай.
За асабісты ўклад у ваенна-патрыятычнае выхаванне грамадзян Рэспублікі Беларусь каштоўным падарункам Аляксей Папоў узнагародзіў палкоўніка ў адстаўцы Аляксандра Чмырова.
Па традыцыі адзначылі ветэранаў сіл спецыяльных аперацый. Юбілейныя медалі «90 гадоў на абароне Айчыны» ўручыў камандзір в/ч 89417 палкоўнік Дзмітрый Кучук.
Са святам вайскоўцаў таксама павіншавалі старшыня Пастаяннай камісіі па нацыянальнай бяспецы Алег Белаконеў, старшыня Пухавіцкага раённага Савета дэпутатаў Аляксандр Прановіч і старшыня раённай арганізацыі «Беларускі саюз афіцэраў» Уладзімір Парфянкоў.
Далей гледачы з цікавасцю глядзелі паказальныя выступленні па рукапашным баі і альпінісцкай падрыхтоўцы. Вайскоўцы рыхтуюць падобныя выступленні да кожнага свята, але заўсёды знаходзяць, чым здзівіць гледачоў. У гэтым годзе праграму ўпрыгожылі элементы вогненнага шоў, якія, дарэчы, выконвалі дзяўчаты.
Вайскоўцы падарылі свята ўсім гараджанам. Выстава ваеннай тэхнікі і ўзбраення, салдацкая каша, цір, — цікава было ўсім. Працавалі атракцыёны для дзяцей, аквагрым, гандлёвыя кропкі, дзе можна было купіць не толькі што-небудзь для перакусу, але і сувеніры на памяць. Шмат гледачоў сабраў святочны канцэрт. Фінальную песню «Сінь» госці падпявалі разам з артыстамі.
Кацярына Дабрыцкая.