Дырэктар ААТ «Пухавічынафтапрадукт» Юрый Лагунчык і Інга Сяргеенка.
Паспрабаваць стаць лепшым па прафесіі зможа зараз кожны работнік аўтазаправачных станцый ГПО «Беларуснафта». Спецыяльна для стымулявання імкнення да прафесійнага росту адміністрацыя і прафкам кампаніі прынялі рашэнне аб правядзенні штомесячнага конкурсу сярод аператараў АЗС у кожнай вобласці і сталіцы нашай краіны.
Адным з першых пераможцаў новага конкурсу стала пухаўчанка Інга Сяргеенка. Яна была прызнана лепшым аператарам Мiнскай вобласці ў красавіку 2020 года.
Расказвае начальнік участка АЗС ААТ «Пухавічынафтапрадукт» Ягор Норык:
- Выбірае лідэраў інфармацыйна-аналітычная сістэма SAP Business Objects Web Intelligence з дадзеных справаздачы «Рэйтынг аператараў». У ацэнцы ўлічваюцца індывідуальныя фактычныя вынікі ўдзельнікаў. А дакладней - тры паказчыкі эфектыўнасці працы: канверсія касавых чэкаў (суадносіны колькасці здзейсненых пакупак спадарожных тавараў і паслуг да агульнай колькасці пакупак), сярэдні чэк (сярэдняя сума продажаў спадарожных тавараў і паслуг у адным чэку) і трафік (сярэдняя колькасць чэкаў з нафтапрадуктамі за 1 гадзіну).
Нам прыемна, што ў ліку першых пераможцаў - наша аператар Інга Сяргеенка. Працуе Інга на АЗС № 9. Заўсёды ветлівая, добразычлівая і ўважлівая да кліентаў. Яна сапраўдны прафесіянал у сваёй справе. І, што вельмі важна, праяўляе ініцыятыву, імкнецца выконваць свае абавязкі так, каб кліенты заставаліся задаволеныя абслугоўваннем і вярталіся да нас зноў і зноў.
За перамогу ў конкурсе Інзе былі ўручаны дыплом, кубак пераможцы і грашовы сертыфікат.
Алена ШАНТЫКА.