Вуліца Ратавальнікаў у Мар'інай Горцы маладая — яна існуе ўсяго каля дзесятка гадоў. Аднак у горадзе наўрад ці знойдзецца чалавек, які не ведаў бы, дзе яна знаходзіцца. Па словах аўтара назвы вуліцы, начальніка аддзела архітэктуры і будаўніцтва райвыканкама Таццяны Сілівончык, першымі «навасельцамі» ў гэтым месцы сапраўды сталі ратавальнікі — раённы аддзел па надзвычайных сітуацыях. А яшчэ тут побач праваслаўны храм, і для яго вернікаў тэма выратавання не менш актуальная.
Галоўнай праблемай новай вуліцы сталі старыя ваенныя казармы: іх перадалі на баланс камунальнага прадпрыемства, але ў тыя часы правесці рэканструкцыю раёну аказалася не пад сілу. І ім паспрабавалі знайсці новых гаспадароў.
Прыхільнікі здаровага ладу жыцця ў Мар'інай Горцы марылі пра тое, каб у горадзе з'явіўся свой фізкультурны комплекс. У 2012 годзе ў адным з рэканструяваных будынкаў адкрылася спартыўная зала для заняткаў баскетболам, валейболам, тэнісам, міні-футболам.
Паступова на гэтай вуліцы ішло і фарміраванне бізнес-зоны. У адной з былых сталовых адкрылі гандлёвы дом, наступным крокам стала рэканструкцыя размешчанай побач казармы. Там распланавалі офісныя памяшканні, адкрыўся гандлёвы цэнтр.
Вуліца Ратавальнікаў стала месцам, дзе ў камфортных умовах працуюць супрацоўнікі раённага цэнтра гігіены і эпідэміялогіі — у жніўні 2016 года служба змяніла прапіску і пераехала ў новы сучасны будынак. Лекары не толькі атрымалі новы будынак, але і правялі сур'ёзную працу па добраўпарадкаванні тэрыторыі каля яго.
Паміж вуліцамі Ратавальнікаў і Новая Зара сфармавалася паркавая зона з тратуарнымі дарожкамі, месцамі для адпачынку дзяцей і дарослых.
На суседняй вуліцы, Іркуцка-Пінскай дывізіі, у чэрвені 2019 года адкрыўся яшчэ адзін новы для горада аб'ект - гісторыка-культурны комплекс «Алея вайсковай Славы», на тэрыторыі якога ўстаноўлены ўзоры вайсковай тэхнікі.
Старыя казармы ўсё яшчэ застаюцца праблемай, аднак знос чарговай з іх значыць, што на вызваленым месцы ў перспектыве з'явяцца новыя аб'екты.
Наталля Пархомчык