У цэнтры ўвагі
Час падрыхтоўкі
Пасля таго, як у школах раёна празвінеў апошні званок, тут пачаліся іншыя клопаты - падрыхтоўка да новага навучальнага года.
На мінулым тыдні старшыня раённага выканаўчага камітэта Віктар Каляда і яго намеснік Наталля Чарнышова пабывалі ў працоўных калектывах Мар'інагорскай дзіцячай школы мастацтваў, СШ №2 горада Мар'іна Горка і Мар'інагорскага КПК дзіцячы сад-сярэдняя школа. Яны пагутарылі з работнікамі ўстаноў адукацыі, пазнаёміліся з матэрыяльнай базай школ, высветлілі, якія праблемы існуюць тут на дадзеным этапе.
Віктар Міхайлавіч, пабываўшы ў абноўленым кабінеце хіміі Мар'інагорскага КПК дзіцячы сад-сярэдняя школа, адзначыў, што тут створаны добрыя ўмовы для арганізацыі навучальнага працэсу, і трэба імкнуцца да таго, каб і ў сельскіх школах у дзяцей была магчымасць атрымліваць веды з прымяненнем новага абсталявання і новых тэхналогій.
Дарэчы, у найбліжэйшы час плануецца набыццё камп'ютарных класаў для Мар'інагорскай гімназіі, СШ №3 горада Мар'іна Горка і Зазерскай сярэдняй школы.
Вольга Лугавая.
