Гэты новы вопыт чарговы раз паказаў, што аўтапарк №19 абраў разумную стратэгію развіцця. Сутнасць яе - развіваць усе магчымыя напрамкі дзейнасці, але стаўку ўсё ж рабіць на грузаперавозкі.
Крызіс, па словах дырэктара аўтапарка Генадзя Сячко, у першую чаргу адбіўся на заказных пасажырскіх перавозках. Турыстычны напрамак у цяперашні час зусім зачыніўся. У дакрызісныя часы аўтобусы аўтапарка працавалі і на ўнутраных турыстычных маршрутах, і на замежных. Цяпер - зацішша. І калі пачнецца ажыўленне, пакуль не зразумела.
Генадзь Сячко.
— У сувязі з абстаноўкай, якая склалася ў нас прыкладна на пяцьдзесят працэнтаў скараціліся аўтобусныя пасажырскія перавозкі, — расказвае Генадзь Іванавіч. — З пачаткам эпідэміі жыхары раёна сталі менш карыстацца грамадскім транспартам. Каб мінімізаваць страты, мы вымушаны былі скараціць колькасць рэйсаў на некаторых маршрутах. Напрыклад, з 9 аўтобусаў, якія на працягу дня працавалі на мінскім напрамку, пакінулі толькі 6. Скарацілі колькасць гарадскіх рэйсаў у Мар'інай Горцы, на Пухавіцкім кірунку, на некаторых сельскіх маршрутах. Зразумела, гэта выклікала незадавальненне ў пасажыраў. Аднак трэба разумець, што кожны выхад аўтобуса на лінію, - гэта вялікія выдаткі. І прадпрыемства не можа сабе дазволіць, каб ён курсіраваў пустым.
Генадзь Іванавіч распавёў, што з самага пачатку развіцця эпідэміі на прадпрыемстве пастараліся прыняць неабходныя меры для таго, каб не дапусціць распаўсюджвання хваробы сярод работнікаў прадпрыемства. Патлумачылі, што калі сярод кіроўцаў, кандуктараў з'явяцца хворыя людзі, то гэта можа пацягнуць за сабой праблемы з транспартным абслугоўваннем насельніцтва раёна. У цяперашні час усе аўтобусы перад выхадам на лінію неабходным чынам апрацоўваюцца. Дэзінфікуючыя сродкі ёсць у дастатковай колькасці. Дарэчы, частку з іх на бязвыплатнай аснове аўтапарку перадало ЗАТ «Аўгуст-Бел». Гэта прыклад партнёрскіх адносін.
Генадзь Іванавіч падкрэсліў, што дзякуючы такім мерам аўтапарку атрымоўваецца пазбягаць праблем, звязаных са здароўем работнікаў, а, значыць, працаваць у штатным рэжыме. Ён таксама адзначыў, што, нягледзячы на сітуацыю працоўны калектыў захавалі. Некалькі дзясяткаў чалавек ва ўзросце старэй за пяцьдзесят гадоў у красавіку-маі адправілі ў чарговыя адпачынкі без адчувальных наступстваў для вытворчай дзейнасці. Людзі такім чынам захавалі і працоўнае месца, і грашовае ўтрыманне.
Па словах Генадзя Іванавіча, аналіз абстаноўкі за апошнія тыдні паказвае, што сітуацыя пачынае змяняцца. Пасажырапаток хай патроху, але пачаў расці: зразумела, што ўсё астатняе жыццё ў самаізаляцыі жыць не будзем. Трэба вучыцца жыць у новых рэаліях.
Калі ў развіцці двух вышэйназваных напрамкаў у дзейнасці аўтапарка з'явіліся аб'ектыўныя цяжкасці, то ў сферы грузаперавозак — насупраць. У красавіку і маі на прадпрыемства прыбылі новыя МАЗы. Тры аўтамабілі спецыяльна для аўтапарка №19 былі сабраны па індывідуальнай замове на Мінскім аўтамабільным заводзе. Ад астатніх іх адрозніваюць некаторыя канструктыўныя асаблівасці: на машынах па просьбе прадпрыемства ўстаноўлены рухавікі вытворчасці фірмы Mercedes - Benz, аб'ём кузава - 20 метраў кубічных. Такім чынам, у цяперашні час аўтапарк валодае 26 самазваламі і ўваходзіць у лік лідэраў па грузаперавозках у вобласці. У маі бягучага года прадпрыемства па перавозцы сыпкіх нярудных матэрыялаў выканала 150 працэнтаў да планавага задання і атрымала даход у суме каля 310 тысяч рублёў. Самымі буйнымі заказчыкамі такіх паслуг застаюцца КУП «Мінскаблдарбуд», ЗАТ «БНБК». У лiку пастаянных кліентаў - сельскагаспадарчыя і іншыя прадпрыемствы раёна.
— У сваёй дзейнасці ў склаўшайся сітуацыі мы разлічваем толькі на ўласныя сілы, — падвёў вынік размовы Генадзь Іванавіч. - Мы робім усё магчымае, каб выконваць свае абавязацельствы незалежна ад знешніх прычын.
Наталля Пархомчык.
