Кожны чалавек хоча жыць у прыгожым і добраўпарадкаваным населеным пункце. Проста адны чакаюць, што нехта прыйдзе і навядзе прыгажосць, а іншыя гатовыя па сваёй ініцыятыве і без лішніх напамінкаў падтрымліваць парадак не толькі ўнутры, але і за агароджай сваіх уладанняў, уносячы ўклад у добраўпарадкаванне роднага населенага пункта. Па словах старшыні Свіслацкага сельскага Савета Леаніда Нечуйвiцера, большасць жыхароў вуліцы Шырокая ў гарадскім пасёлку Свіслач ставяцца да катэгорыі тых, хто гатовы актыўна дапамагаць мясцовай уладзе ў добраўпарадкаванні.
- Шырокая - гэта новая вуліца індывідуальнай забудовы, якая развіваецца па кірунку да ЦЭЦ-5, — распавёў Леанід Дзмітрыевіч. - У асноўным усе, хто тут жыве, шчыра хочуць, каб месца, дзе стаяць іх дамы, сапраўды было прыгожым. Калі работнікі сельвыканкама наведваюць гэтую вуліцу, усе яе жыхары ідуць на кантакт, з разуменнем ставяцца да просьбаў утрымліваць у парадку ўчасткі перад сваімі домаўладаннямі, а многія праяўляюць ініцыятыву, папярэдне цікавячыся, што можна зрабіць на прылеглай тэрыторыі, а што не. Напрыклад, жыхар вуліцы Дзяніс Сямёнчык уладкаваў недалёка ад свайго дома дзіцячую пляцоўку, правёў добраўпарадкаванне тэрыторыі агульнага карыстання і пастаянна падтрымлівае на ёй парадак.
Увесну гэтага года сельвыканкам сумесна з жыхарамі вуліцы арганізаваў работы па яе азеляненні. У асноўным уздоўж вуліцы высадзілі клён і рабіну, а ў адным месцы — групу бяроз, якія, калі паднімуцца, павінны арганізаваць маляўнічы куток. За маладымі дрэўцамі даглядалі ўсе разам, і ўжо прыкметна, што яны прыжыліся. З часам вуліца Шырокая павінна стаць зялёнай і ўтульнай.
Наталля Пархомчык.
