Ваенны аркестр іграе знакамітую мелодыю «Дзень Перамогі», і ў ветэрана наварочваюцца слёзы на вачах. Так сёння віншавалі з надыходзячым святам Міхаіла Мацвійца з Мар'інай Горкі. Музычнае віншаванне 90-гадоваму ветэрану наладзілі прама ў двары дома.
Міхаіл Аляксандравіч на фронце не пабываў, але з 14 гадоў працаваў на Канскім біяхімзаводзе ў Краснаярскім краі. Завод вырабляў этылавы спірт і фурфурол, у ваенны час такая прадукцыя лічылася стратэгічнай. На заводзе адпрацаваў 42 гады. У працоўнай кніжцы мае 174 запісы аб розных заахвочваннях і ўзнагародах. Адна з самых значных для ветэрана - ордэн Знак Пашаны. Напярэдадні 9 Мая з'явілася яшчэ адна ўзнагарода - юбілейны медаль да 75-годдзя Перамогі.
Юбілейны медаль да 75-годдзя Перамогі Міхаілу Мацвійцу ўручае ваенны камісар Максім Уласаў.
Ветэрана павіншавалі старшыня Мінскага абласнога Савета дэпутатаў Наталля Якубіцкая, прадстаўнікі кіраўніцтва Пухавіцкага райвыканкама, вайскоўцы і моладзь.
— Вайна — гэта вялікая трагедыя для нашага народа. Мы тое пакаленне, якое беражліва захоўвае памяць аб Вялікай Перамозе — адзначыла ў сваім віншаванні Наталля Якубіцкая. - Мы павінны перадаць нашу гісторыю нашчадкам. Гэта неабходна для таго, каб людзі разумелі, якой цаной ветэранам і нам дастаўся мiр.
Сёння ў Мар'інай Горцы ў рамках акцыі «Беларусь памятае. Салдаты Перамогі» віншаванні ў такім жа фармаце прымаюць яшчэ дванаццаць ветэранаў.
Кацярына ВЕРНIКОЎСКАЯ.