Старшыня Мінскага аблвыканкама Аляксандр Турчын ўручыў пашпарты юным грамадзянам Міншчыны. Урачыстая цырымонія адбылася ў музеі гісторыі Вялікай Айчыннай вайны, паведамляе прэс-служба Мінскага аблвыканкама.
Удзельнікамі мерапрыемства сталі 23 навучэнцы з розных рэгіёнаў вобласці. Усім ім споўнілася па 14 гадоў. Пры гэтым яны ўжо дамагліся значных для свайго ўзросту поспехаў у вучобе, актыўна ўдзельнічаюць у грамадскай, спартыўнай, культурнай дзейнасці, спрабуюць свае сілы на алімпіядах, творчых конкурсах, спаборніцтвах.
Пашпарт з рук старшыні аблвыканкама атрымала і вучаніца Мар'інагорскага КПК дзіцячы сад-сярэдняя школа Крысціна Ламака. Дзяўчына прафесійна займаецца футболам. Сярод спартыўных дасягненняў Крысціны - 1 месца ў першынстве Мінскай вобласці па футболе для дзяўчат у праграме развіцця жаночага футбола УЕФА.
Аляксандр Турчын цёпла і шчыра павіншаваў прысутных са святам — Днём Канстытуцыі і асабіста ўручыў кожнаму вучню пашпарт і кнігу «Я - грамадзянін Рэспублікі Беларусь».
- У лёсе кожнага чалавека ёсць падзеі, якія застаюцца ў яго памяці назаўжды. Сёння вы атрымліваеце пашпарты, робячы тым самым першы сур'ёзны крок у дарослае, свядомае жыццё – сказаў старшыня аблвыканкама.
Аляксандр Турчын адзначыў, што месца гэтай урачыстай цырымоніі абрана не выпадкова. Зусім хутка Беларусь шырока адзначыць 75-годдзе Вялікай Перамогі.
- Хочацца, каб вы з юных гадоў адчувалі жывую сувязь з пакаленнем пераможцаў, подзвігі і тварэнні якіх дазваляюць сёння Міншчыне быць наймацнейшым эканамічным цэнтрам Беларусі. Мы трывала ўтрымліваем лідзіруючыя пазіцыі ў аграпрамысловым комплексе. Дынамічна развіваецца эканоміка і сацыяльная сфера. Пра гэта трэба памятаць і імкнуцца ўнесці свой уклад у агульную справу, – падкрэсліў Аляксандр Турчын.
Юныя грамадзяне Беларусі акрамя пашпартоў і кніг атрымалі магчымасць наведаць з экскурсіяй музей Вялікай Айчыннай вайны. У музеі – 11 вялікіх залаў і больш за 8 тысяч экспанатаў, сярод якіх сапраўдныя баявыя машыны, самалёты і нават грузавы вагон нямецкага эшалона. Храналагічная экспазіцыя ахоплівае больш за 30 гадоў гісторыі - з 1920-х да канца 1950-х гадоў мінулага стагоддзя. Але галоўны акцэнт - беларусы ў Вялікай Айчыннай вайне і іх неацэнны ўклад у перамогу, якая ёсць не ў кожнага народа.
Фота - Павел Арлоўскі.