Дзмітрый Кучук, Алег Белаконеў, Віктар Каляда.
У суботу святкаванне Дня абаронцаў Айчыны і Узброеных Сіл Рэспублікі Беларусь у Мар'інай Горцы пачалося з мітынгу на Алеі славы. Кветкі да мемарыяла ўсклалі кіраўніцтва раёна, прадстаўнікі грамадскіх арганізацый, працоўных калектываў.
З надыходзячым святам пухаўчан павіншавалі старшыня райвыканкама Віктар Каляда і дэпутат Палаты Прадстаўнікоў Нацыянальнага сходу Рэспублікі Беларусь Алег Белаконеў. Асаблівыя словы падзякі яны выказалі ветэранам: дзякуючы іх подзвігу мы жывем сёння пад мірным небам.
Камандзір вайсковай часці 89417 Дзмітрый Кучук падкрэсліў, што ў гэтым годзе наша краіна адзначае 75-годдзе Перамогі. Сімвалічна, што мерапрыемства праходзіць на Алеі славы, якая прысвечана ўсім відам і родам войскаў Узброеных Сіл Савецкага Саюза і Рэспублікі Беларусь. Каштоўным падарункам за актыўны ўдзел у дзейнасці па забеспячэнні абараназдольнасці Рэспублікі Беларусь і значны асабісты ўклад у ваенна-патрыятычнае выхаванне грамадзян нашай краіны Дзмітрый Кучук узнагародзіў старшыню райвыканкама Віктара Каляду. За актыўную працу па патрыятычнаму выхаванню падрастаючага пакалення каштоўным падарункам ад афіцэрскага сходу брыгады быў узнагароджаны ганаровы салдат 6-й роты спецыяльнага прызначэння палкоўнік у адстаўцы Генадзь Юшкевіч. Граматамі былі заахвочаны і іншыя вайскоўцы брыгады.
Працягнулася мерапрыемства ў парку ў Новым Світанку. Самай відовішчнай часткай забаўляльнай праграмы сталі паказальныя выступленні воінаў-спецназаўцаў і баявы эпізод.
У парку працавала шмат забаўляльных зон. Цікава было і дзецям, і дарослым. Выстава ўзбраення, абмундзіравання, баявой тэхнікі: можна было не толькі сфатаграфавацца побач з усім гэтым, але і патрымаць у руках і нават уявіць сябе на месцы кіроўцы ваеннага аўтамабіля.
У парку было арганізавана некалькі інтэрактыўных зон. Баі падушкамі, перацягванне ліны, цір — забавы мог знайсці любы жадаючы. Нават быць гледачом гэтых святочных забаў таксама было цікава.
На сцэне ў гэты час працягваўся святочны канцэрт, недалёка працавалі гандлёвыя палаткі. Усіх жадаючых частавалі салдацкай кашай.
