Памяць загінуўшых ушанавалі хвілінай маўчання, затым усклалі вянкі і кветкі. Благачынны 1-га Пухавіцкага благачыння протаіерэй Аляксандр Цалкоў здзейсніў малебен.

Анатоль Сярко пасля мітынгу яшчэ доўга ўглядаўся ў таблічкі з імёнамі загінуўшых воінаў. Многіх з іх ён ведаў асабіста. Анатоль Уладзіміравіч займаўся фарміраваннем 334-га атрада, больш двух гадоў служыў у Афганістане. Ушанаваць памяць загінулых таварышаў і ўсіх, хто не вярнуўся з вайны, ён упершыню прыйшоў разам з унукам Ягорам. Хлапчуку ўсяго чатыры гады. Анатоль Сярко ўпэўнены, што выхоўваць патрыётаў трэба з ранняга дзяцінства, таму часта паказвае ўнуку фота і кнігі пра тыя падзеі.

Урачыстае мерапрыемства прайшло ў клубе в/ч 89417. Са сцэны ў адрас воінаў-інтэрнацыяналістаў гучалі словы падзякі за подзвіг. Старшыня райвыканкама Віктар Каляда адзначыў, што воіны-афганцы першымі сталі на барацьбу з міжнародным тэрарызмам. Віктар Міхайлавіч таксама падкрэсліў, што воіны-афганцы праводзяць вялікую працу па патрыятычным выхаванні моладзі. Удзячнасцю старшыні Пухавіцкага райвыканкама адзначаны члены грамадскага аб'яднання «Беларускі саюз ветэранаў вайны ў Афганістане» Барыс Лійц, Юрый Каршакевіч і Юрый Шапавалаў.

— Памяць пастаянна вяртае нас у Афганістан, — падкрэсліў у сваім выступе старшыня раённай арганізацыі ветэранаў вайны ў Афганістане Віктар Болдыраў. Ён, а таксама камандзір вайсковай часткі Дзмітрый Кучук уручылі граматы воінам-афганцам за актыўную грамадскую пазіцыю.

Канцэртная праграма перанесла ўсіх у тыя ваенныя падзеі. ВІА «Зорка», Руслан Гайдукевіч, Мілана Яцэвіч, Арцём Мяцельскі і іншыя вайскоўцы выканалі афганскія песні. Кожная кампазіцыя суправаджалася відэашэрагам. Танцавальны нумар падрыхтавалі вучні СШ №3 г. Мар'іна Горка. Усе нумары былі выкананы настолькі эмацыйна, што многія гледачы не змаглі стрымаць слёз. Пасля канцэрта ўсе жадаючыя наведалі музей вайсковай часці.

Кацярына Вернiкоўская.