Напярэдадні ў ДУА «Сярэдняя школа №3 г. Мар'іна Горка» адбылася сустрэча вучняў з воінамі-інтэрнацыяналістамі. Школьнікі падрыхтавалі літаратурную кампазіцыю пра падзеі той вайны. Сустрэча была прысвечаная тым, хто спазнаў усе нягоды вайны, чые нялёгкія вайсковыя дарогі прайшлі праз Афганістан.
- Там, у далёкім Афганістане, савецкія воіны праявілі лепшыя чалавечыя якасці: мужнасць, стойкасць і высакароднасць. Будзем успамінаць пра мужнасць і гераізм тых, хто выжыў у пекле той вайны, і тых, хто не вярнуўся, - казалі хлопцы са сцэны ў сваіх выступах.
Хвілінай маўчання ўсе прысутныя ўшанавалі памяць загінуўшых.
- 600 тысяч савецкіх грамадзян прайшлі праз вайну ў Афганістане — адзначыў ваенны камісар Пухавіцкага раёна Максім Уласаў. - 20 тысяч не вярнуліся дадому. У тым ліку — 751 беларус. Калі мой бацька вярнуўся з Рэспублікі Афганістан, мне было сем гадоў. У той час разам з сябрамі мы бегалі з цацачнымі аўтаматамі і не разумелі, што з вайны людзі могуць і не вярнуцца…
Ветэран баявых дзеянняў у Афганістане Аляксандр Шманок перадаў школьнаму музею рарытэтныя вінілавыя пласцінкі з песнямі воінаў-інтэрнацыяналістаў, якія гучалі ў гады вайны. Анатоль Арлоў прачытаў свой верш. Ветэраны баявых дзеянняў у Афганістане Уладзімір Чыжык, Яўген Яцэнка, удава загінулага воіна-афганца Мікалая Гарбунова Ірына пажадалі навучэнцам ніколі не ведаць, што такое вайна.
Анастасія Плятнёва.