Падрыхтоўка да перапісу насельніцтва ішла некалькі гадоў, і зладжанай камандай мы прарабілі вялікую працу, падкрэсліла, адкрываючы цырымонію ўзнагароджання, намеснік старшыні раённага выканаўчага камітэта Наталля Чарнышова. Яна падзякавала ўсім, хто быў задзейнічаны ў гэтай кампаніі, за тое, што яны выдатна выканалі пастаўленую задачу.
Начальнік аддзела статыстыкі па Пухавіцкім раёне Леанід Краснік нагадаў, што ў 2017 годзе з мэтай каардынацыі працы ўсіх службаў была створана раённая камісія па перапісу насельніцтва. За перыяд з 2017 па 2019 гады адбылося 7 пасяджэнняў, на якіх вырашаліся надзённыя пытанні. Важным этапам стала праца па навядзенні парадку ў адраснай гаспадарцы. Яна была паспяховай. Леанід Міхайлавіч выказаў пажаданне, каб і ў наступным усё, што было зроблена ў плане адраснай гаспадаркі, падтрымлівалася на дасягнутым узроўні.
Для правядзення перапісу насельніцтва, які адбыўся ў кастрычніку мінулага года, у раёне было створана 4 перапісныя ўчасткі: два ў Мар'інай Горцы і два ў гарадскім пасёлку Рудзенск. Да працы было прыцягнута 94 чалавекі перапіснога персаналу. Усе яны прайшлі навучанне, так як упершыню перапіс насельніцтва праводзілася з прымяненнем інтэрнэт-тэхналогій.
Немалаважным фактарам у паспяховай працы стала магчымасць свабодна перасоўвацца па населеных пунктах раёна. Арганізацыі і прадпрыемствы выдзелілі 45 адзінак транспарту, за што Леанід Міхайлавіч асабліва падзякаваў кіраўнікам. Напрыканцы ён адзначыў ролю раённага выканаўчага камітэта ў арганізацыі і правядзенні перапісу насельніцтва ў нашым рэгіёне. А таксама паведаміў, што дадзеныя перапісу насельніцтва ў Рэспубліцы Беларусь яшчэ апрацоўваюцца. Канчатковы вынік плануецца падвесці ў другім паўгоддзі бягучага года.
Наталля Чарнышова і Леанід Краснік уручылі 37 падзячных лістоў кіраўнікам прадпрыемстваў, старшыням сельскіх і пасялковых выканаўчых камітэтаў за ўклад у арганізацыю і правядзенне перапісу насельніцтва ў нашым раёне. Падзякі атрымалі і самыя актыўныя перапісчыкі. Усяго ў раёне ўручаны 122 такія ўзнагароды.
Наталля Васільева.
