Аб'яднаць такіх хлопцаў і дапамагчы рэалізаваць свае таленты ў дзяржаўнай установе адукацыі «Сярэдняя школа №3 г. Мар'іна Горка» дапамог школьны КВЗ пад кіраўніцтвам энергічнага таленавітага педагога Крысціны Янковай, якая з'яўляецца і кіраўніком, і сцэнарыстам, і рэжысёрам школьнай каманды КВЗ «Дзеці 90-х».

Нядаўна каманда прымала ўдзел у адкрытым абласным фестывалі каманд КВЗ «Кубак губернатара Мінскай вобласці». На сцэне Палаца культуры горада Салігорска 21 каманда з розных раёнаў Міншчыны аспрэчвала галоўны прыз - Кубак губернатара. Тэма фестывалю «Маладосці кожнае імгненне». Кожнай з каманд трэба было выступіць у вольным стылі ў рамках конкурсу «Фрыстайл», паказаўшы сваё разуменне маладосці і яе галоўных каштоўнасцяў.

У хлопцаў быў вельмі напружаны дзень: спачатку трэба было адрэпетаваць выступ і ўзгадніць праграму з Аляксеем Святловым - галоўным рэдактарам фестывалю, галоўным рэдактарам Прэм'ер-лігі КВЗ Мінска і піяр-менеджарам тэлевізійнай Міжнароднай лігі Міжнароднага саюза КВЗ. Гэта першае выступленне хлопцаў на абласным узроўні і яго заўвагі, і парады былі вельмі важнымі. І нарэшце, сам выступ: на працягу 5 хвілін хлопцы спявалі, танцавалі, жартавалі на тэму 90-х і, вядома, не раз прымушалі смяяцца гледачоў і суддзяў. Арганізатары гульні адзначылі, што калі б быў заснаваны прыз за лепшыя касцюмы, то ён напэўна б дастаўся камандзе «Дзеці 90-х», якая прадстаўляла Пухавіцкі раён, падабраўшы дакладныя вобразы ў адпаведнасці з назвай.

Гэты выступ КВЗэншчыкі з ДУА «Сярэдняя школа №3 г. Мар'іна Горка» не прынёс перамогі, але хіба гэта істотна, калі гаворка ідзе пра маладых, таленавітых, амбіцыйных і крэатыўных, гатовых дарыць людзям смех і радасць.

КВЗ скончыўся, а ўспаміны застануцца надоўга. Удзел у фестывалі даў дзецям магчымасць пазнаёміцца з КВЗ за яго кулісамі, заўважыць тыя нюансы, на якія раней не звярталі ўвагу.

Людміла ТУЖЫКАВА.