Рэспубліканская добраахвотная акцыя «Чысты лес» прайшла ў мінулыя выхадныя ў нашым раёне. Сёлета кампанія па навядзенні парадку ў лясным фондзе прымеркавана да Года малой радзімы, і яна стала больш маштабнай, чым у мінулыя гады. У ёй прынялі ўдзел больш за 500 чалавек: навучэнцы школ, работнікі арганізацый і лясной гаспадаркі.
— Пачалася акцыя ў нашым лясгасе на прыпыначным пункце недалёка ад вёскі Маліннікi, — распавяла намеснік дырэктара па ідэалагічнай рабоце ДЛГУ «Пухавіцкі лясгас» Вольга Камароўская. — Тут працавалі добраахвотнікі з Мінска, прадстаўнікі Мінскага завода колавых цягачоў і Дзяржаўнага ваенна-прамысловага камітэта. Яны прыбіралі і складавалі сухія галінкі, апалае лісце, якое леснікі будуць спальваць. А таксама сабралі ў поліэтыленавыя пакеты і вывезлі бытавое смецце. Усяго мінскімі валанцёрамі было прыбрана 7 кубічных метраў смецця.
Уздоўж трасы Мiнск-Гомель, каля вёскі Падбярэззе, прыбіралі месца адпачынку валанцёры з цэнтральнага апарата Следчага камітэта горада Мiнска.
Да акцыі «Чысты лес» далучыліся і школьнікі ДУА «Рудзенская сярэдняя школа» і ДУА «Сярэдняя школа №1 пасёлка Дружны», якія працавалі ў гадавальніку ў Рудзенскім лясніцтве.
Больш за два гектары лесу ў гэты дзень было пасаджана ў Талькаўскім лясніцтве. Там пасадкай маладых соснаў і бяроз разам з леснікамі займаліся навучэнцы Мар'інагорскай гімназіі з настаўнікам Ірынай Макрусевай. Актыўны ўдзел у пасадцы лесу прынялі таксама спецыялісты Пухавіцкага раённага аддзела Следчага камітэта.
Падчас правядзення акцыі валанцёры аказалі істотную дапамогу лясгасу ў ліквідацыі несанкцыянаваных звалак бытавых адходаў у лясах, якія прымыкаюць да аўтамабільных дарог. Усяго было прыбрана каля 40 кубічных метраў, у тым ліку і бытавога смецця. Ва ўсіх лясніцтвах пасаджана 10 гектараў лесу, гэта больш за 5 тысяч штук саджанцаў хвоі і бярозы.
- Сёлета асаблівую ўвагу мы надалі падрастаючаму пакаленню, - кажа Вольга Уладзіміраўна. - Кожны школьнік, які прыняў удзел у акцыі, атрымаў ад лясгаса сімвалічны сувенір: фірмовы нататнік і стылус.
Акцыя працягваецца. Увесь тыдзень леснікі будуць займацца пасадкай маладога лесу. Усяго ж за восень ва ўсіх 11 лясніцтвах яго неабходна пасадзіць 100 гектараў.