Святочны настрой на працягу ўсяго дня гасцям фестывалю-кірмашу ствараў народны ансамбль народнай песні «Мілавіца» Дуброўскага СДК. Усе, хто заходзіў на шчодрs Пухавіцкш падворак, сыходзіць не спяшаліся. «Пухавіцкі дзівосы» — гэта таленавітыя майстры і іх працы, прэзентацыі аграсядзіб і музейных комплексаў, дэгустацыя прадукцыі прадпрыемстваў раёна. ААТ «Машхарчпрад» прапаноўвала паспрабаваць чыпсы, снэкi і кукурузныя палачкі. Усім, хто прытрымліваецца здаровага харчавання, прадпрыемства прапаноўвала прадэгуставаць навінку - грачаныя палачкі. На выставе-продажы можна было купіць розную прадукцыю гандлёвай маркі «Мiра».
Смачныя кандытарскія і кулінарныя вырабы прадставіла ТП ТАА «Пухавiчыгандль». СТАА «Марозпрадукт» прапаноўвала марозіва. Апетытна выглядала выстава-прэзентацыя ДЛГУ «Пухавіцкі лясгас»: тут усіх ахвотных частавалі юшкай.
Прыцягвала ўвагу гасцей нашага падворка выстава работ узорнай студыі «Мар'інка» цэнтра творчасці дзяцей і моладзі «Світанак» (кіраўнік Ларыса Гнеўчынская). Народныя строі з мастацкай вышыўкай, дэкаратыўныя лялькі, роспіс па тканіне - кожную дэталь хацелася ўважліва разгледзець.
- Усё, што тут прадстаўлена, зроблена на аснове Пухавіцкага ладу. Напрыклад, вось такія арнаменты выкарыстоўваліся на Пухаўшчыне — распавяла намеснік дырэктара па вучэбна-выхаваўчай рабоце ГУДО «Цэнтр творчасці дзяцей і моладзі «Світанак» Наталля Хадыка. - На занятках у студыі хлопцы вучацца не толькі дэкаратыўнай тэхніцы, разам з гэтым яны вывучаюць асаблівасці нацыянальнай вышыўкі і сімволіку беларускага арнаменту.
Майстар-клас па стварэнні лялек-абярэгаў праводзілі настаўнікі Дукорскага КПК дзіцячы сад-сярэдняя школа. Юныя наведвальнікі кірмашу з радасцю рабілі абярэгі сваімі рукамі. Таксама ўсе жадаючыя маглі паспрабаваць свае сілы ў лепцы і роспісу вырабаў з гліны.
Свае паслугі і талент мясцовых майстроў прэзентавалі Музейны комплекс старажытных рамёстваў і тэхналогій «Дудуткі» і Музейны комплекс «Дукорскі маёнтак». Госці нашага падворка адзначалі, што ўжо наведвалі гэтыя месцы, але і зараз сысці без сувеніраў не змаглі. Многія жыхары вобласці адкрылі для сябе яшчэ адно цікавае месца на Пухаўшчыне — аграсядзібу «Дары Вялеса». Гаспадары распавялі аб святах і народных гуляннях, якія з размахам адзначаюць у аграсядзібе. Гасцей у Блужы напэўна стане больш.
На нашым падворку былі арганізаваны маляўнічыя фотазоны. Асабліва актыўна госці «Дажынак» фатаграфаваліся з папугаем Гошам - карпаратыўным персанажам СТАА «Марозпрадукт».