У нашай рэспубліцы дзень маці адзначаюць 14 кастрычніка, у дзень Пакрова Прасвятой Багародзіцы. Асаблівая пашана ў гэты дзень шматдзетным маці. У нашым раёне 923 шматдзетныя сем'і. Прычым 735 сем'яў выхоўваюць 3-х дзяцей, 128 - выхоўваюць 4-х дзяцей, 59 сем'яў - 5 і больш дзяцей. У адной сям'і растуць 11 непаўналетніх дзяцей. Цікава заўважыць, што 91 мама ў нашым раёне выхоўвае двайнятак, адна - трайнятак. Высокай узнагародай — ордэнам Маці ўзнагароджаны 66 шматдзетных маці раёна.

Напярэдадні Дня маці ў Цэнтры сацыяльнага абслугоўвання насельніцтва традыцыйна праводзяцца разнастайныя мерапрыемствы сацыяльнай накіраванасці.

У аддзяленні забеспячэння дзённага знаходжання для інвалідаў, напрыклад, на мерапрыемства маладыя людзі з абмежаванымі магчымасцямі прыйшлі разам са сваімі бацькамі. Хлопцы прадэманстравалі мамам свой талент. Яўген Кудзімаў прадставіў публіцы серыю фокусаў, Ігар Клімаў і Аляксей Фадзееў арганізавалі міні-канцэрт. Ганна Сарока, Таццяна Капская, Андрэй Сазонаў прачыталі кранальныя вершы.

Удзельнікі клуба «Школа сямейнага выхавання» для дзяцей-сірот і дзяцей, якія засталіся без апекі бацькоў і маюць уласныя сем'і, сабраліся на занятак, накіраваны на ўмацаванне сямейных каштоўнасцяў і развіццё творчых здольнасцяў.

У рамках пасяджэння клуба «Вера, надзея, любоў» прайшла святочная праграма для грамадзян, якія стаяць на сацыяльным абслугоўванні дома ў аграгарадках Блужа, Бор і Энергія. Яе падрыхтавалі сацыяльныя работнікі, якія, дарэчы, ніколі не забываюць павіншаваць сваіх падапечных: часам сацыяльны работнік становіцца практычна членам сям'і, вельмі блізкім чалавекам.

Цешце сваіх мам частымі візітамі, клопатам і любоўю, таму што мама — самы дарагі чалавек для кожнага з нас.

Дарагія нашы мамы! Усё лепшае ў жыцці пачынаецца з вас — пяшчотных, уважлівых, любячых і любімых. Вы даяце новае жыццё, расціце выдатных сыноў і дачок, фарміруеце сямейнае шчасце і дабрабыт, ствараеце душэўны камфорт.

Асаблівыя словы ўдзячнасці за высакароднасць, цярпенне, сардэчнасць хочацца адрасаваць жанчынам, якія ўзялі на сябе вялікую працу па выхаванні дзяцей-сірот і дзяцей, якія апынуліся ў складанай жыццёвай сітуацыі.

Хай заўсёды цяплом вашых душ будуць сагрэты дамы, хай пяшчота, клопат і ласка вашых дзяцей будуць удзячнасцю за бяссонныя ночы і неспакойныя дні. Хай будуць здаровыя і шчаслівыя вашыя дзеці і ўсе тыя, хто вам бясконца дарог.