Падзяка старшыні Пухавіцкага райвыканкама абвешчаная тром супрацоўнікам Пухавіцкага РАУС, якія падчас пасяўной і ўборачнай кампаній у складзе рэйдавых груп ажыццяўлялі кантроль за забеспячэннем у сельскагаспадарчых арганізацыях правапарадку, выкананнем мер па недапушчэнні крадзяжоў матэрыяльных каштоўнасцяў, за выкананнем пры правядзенні работ патрабаванняў бяспекі і правілаў дарожнага руху.
Па матэрыялах праверак сельскагаспадарчых арганізацый, якія праводзіў оперупаўнаважаны аддзялення па барацьбе з эканамічнымі злачынствамі Антон Гілеўскі, у бягучым годзе ўзбуджана 10 крымінальных спраў, папярэджаны матэрыяльны ўрон на суму больш за 5 тысяч рублёў.
Старэйшым участковым інспектарам міліцыі Фёдарам Русовічам выяўлена шэсць фактаў крадзяжу і захоўвання выкрадзенага дызельнага паліва. Да адміністрацыйнай адказнасці за знаходжанне на працоўным месцы ў стане алкагольнага ап'янення прыцягнута тры вартаўнікі сельгасарганізацый. Па матэрыялах праверак узбуджана тры крымінальныя справы.
Інспектар дарожна-патрульнай службы аддзела ДАІ Пухавіцкага РАУС Уладзімір Цераховіч выявіў тры факты крадзяжу і перавозкі выкрадзенага з бакаў сельгасмашын паліва. 47 работнікаў сельскагаспадарчых арганізацый прыцягнутыя да адміністрацыйнай адказнасці за неналежную эксплуатацыю транспартных сродкаў.
Усяго падчас сельскагаспадарчых кампаній у бягучым годзе супрацоўнікі РАУС правялі 344 рэйды па кантролі за забеспячэннем у сельгасарганізацыях умоў па недапушчэнні крадзяжоў матэрыяльна-тэхнічных каштоўнасцяў. Выпісана 39 прадстаўленняў аб ліквідацыі прычын, якія спрыяюць падобным парушэнням. Устаноўлена 11 асоб, якія ўчынілі крадзяжы матэрыяльных каштоўнасцяў.