Іван Гардзейчык распавёў аб працы рэспубліканскай ветэранскай арганізацыі, закрануў пытанні, уключаныя ў план адзінага дня інфармавання насельніцтва. Нагадаў ён і аб прызначаных на восень гэтага года парламенцкіх выбарах, адзначыўшы, што ветэраны, якія маюць вялікі жыццёвы вопыт, для малодшых пакаленняў заўсёды паказвалі прыклад узважанага падыходу да прыняцця важных рашэнняў.
Падчас сустрэчы з'явілася нямала пытанняў для абмеркавання. Леанід Філановіч заўважыў, што ў апошнія гады з'явілася нямала праблем у плане падтрымкі чарнобыльцаў-ліквідатараў, і да пытання аб іх статусе ёсць неабходнасць вярнуцца. Удзельнікі мерапрыемства гаварылі аб захаванні льготы на праезд у грамадскім транспарце для пенсіянераў на працягу ўсяго года, а не толькі ў летні перыяд, аб працы па ваенна-патрыятычным выхаванні. Былі пытанні, якія тычацца жыцця горада і раёна. Шэраг закранутых праблем Іван Гардзейчык паабяцаў падняць на адпаведным узроўні, тое, што тычыцца раёна, узяла на заметку Наталля Чарнышова.
