Жыхары Мар'інай горкі прывыклі бачыць вайскоўцаў на вуліцах райцэнтра. Але калона ваенных аўтамашын, якая на наступны дзень пасля галоўнага свята краіны спынілася ў цэнтры горада, прыцягнула да сябе ўвагу. І асабліва ўзмацнілася цікавасць мінакоў, калі вайскоўцы пачалі станавіцца ў парадны строй: сцяганосцы, чароўныя дзяўчаты ў параднай форме, статныя юнакі ў поўнай ахоўнай экіпіроўцы. Так у горад вярнуліся вайскоўцы в/ч 89417, якія прымалі ўдзел у ваенным парадзе, прысвечаным Дню Незалежнасці Рэспублікі Беларусь і 75-годдзю вызвалення Беларусі ад нямецка-фашысцкіх захопнікаў.

Кароткі даклад камандзіру часткі, і пад гукі аркестра ўрачыстым маршам спецназаўцы адправіліся ў размяшчэнне часткі. А жыхары Мар'інай Горкі, якія сталі сведкамі гэтага дзейства, яшчэ раз выпрабавалі тыя ж пачуцці, што і падчас трансляцыі галоўнага парада года, калі дыктары абвясцілі, што перад трыбунамі праходзяць вайскоўцы в/ч 89417 — гонар сіл спецыяльных аперацый.

— Брыгада ў такім мерапрыемстве прымае ўдзел не першы раз, — растлумачыў намеснік начальніка аддзялення ідэалагічнай работы вайсковай часткi 89417 Дзяніс Жур. - Дарэчы, у 2015 годзе на Дзень Перамогі нашы байцы прайшлі ўрачыстым крокам па Краснай плошчы ў Маскве.

Адказваючы на пытанне, як праходзіць адбор удзельнікаў такога важнага мерапрыемства, Дзяніс Аляксандравіч сказаў, што сёння ўвесь асабісты склад гатовы прадстаўляць брыгаду на ваенным парадзе. Але і сярод роўных ёсць першыя. І гэта вялікі гонар - стаць удзельнікам такога мерапрыемства.

Усяго ў парадзе бралi ўдзел 180 вайскоўцаў в/ч 89417: 150 чалавек, у ліку якіх былі і жанчыны, прайшлі ў пешай скрынцы, кіроўцы правялі ў калоне тэхніку. Для таго, каб годна прадставіць і сваю частку ў прыватнасці, і Сілы спецыяльных аперацый наогул, ім давялося нямала папрацаваць. Трэніроўкі на сваёй базе яны пачалі яшчэ ў лютым. У маі прыбылi ў Мінск і працягнулі адточваць неабходныя навыкі на базе Ваеннай акадэміі Рэспублікі Беларусь і на месцы правядзення парада.

Падчас парада вайскоўцы прадэманстравалі сродкі індывідуальнай абароны і ўзоры зброі, якія маюцца на ўзбраенні ў брыгадзе. Усё гэта інавацыйныя ўзоры беларускай вытворчасці.

Удзельнікі галоўнага параду краіны заслужылі ўрачыстую сустрэчу. Яны зрабілі ўсё магчымае, каб годна прадставіць родную частку падчас грандыёзнага дзейства, за якім сачылі мільёны жыхароў нашай краіны, і не толькі.