Да ранішняга ўздыму траса для ўдзельнікаў абласных спаборніцтваў па водным турызме была гатова. Якая яна, ведалі адзінкі. Для юных байдарачнікаў яна (па правілах) павінна быць незнаёмай.

- Пакуль гэты від турызму мы толькі пачынаем асвойваць — распавядае дырэктар раённага цэнтра турызму дзяцей і моладзі Сяргей Махнач. — У мінулым годзе ўпершыню паспрабавалі свае сілы ў спаборніцтвах. Гэта стала магчымым пасля таго, як у нашым распараджэнні з'явіліся байдаркі. Мы змаглі паўнавартасна трэніравацца і сфармаваць некалькі экіпажаў. Сёння ў цэнтры ёсць катамаран і 7 байдарак. Дапамогу ў іх набыцці аказала Пухавіцкая МПМК-14.

Юных байдарачнікаў трэніруе Андрэй Козыраў. Летась высока падняцца ў турнірнай табліцы ў пухаўцаў не атрымалася. Але пэўны вопыт набылі.

Сёлета ўдасканальвалі свае навыкі ў водным турпаходзе. Хлопцы прайшлі па рэках Пухаўшчыны каля 70 кіламетраў. Вучыліся пераадольваць натуральныя і штучныя перашкоды. І да чарговых стартаў падышлі даволі ўпэўнена: у першы ж дзень у каманднай гонцы па рэках Таль і Свіслач (маршрут даўжынёю 3 кіламетры) паказалі другі вынік сярод васьмі каманд.

У другім відзе спаборніцкай праграмы — слаламе — прымалі ўдзел два экіпажа ад кожнай каманды. Адзін з экіпажаў абавязкова павінен быў быць змяшаным (хлопчык і дзяўчынка). У нас у складзе такога экіпажа - Сяргей Сіняўскі і Ліза Тарлоўская. Другой байдаркай кіравалі Багдан Нямагай і Рома Усцінчык.

Усе хлопцы займаюцца ў секцыі турызму. Маюць вопыт удзелу ў турзлётах. Зараз жа ў цёплы час года ўдасканальваюць і тэхніку воднага турызму. Кажуць, што займацца гэтым вельмі цікава. Нават Ліза, далікатная ад прыроды дзяўчынка, без страху садзіцца за вёслы і ўступае ў барацьбу з цягам. Экстрым? Ну, хіба калі ты наогул не гатовы. Калі займаўся, то не страшна. Галоўнае - хутка рэагаваць і разумець адзін аднаго.

Нашы экіпажы, мабыць, умеюць гэта рабіць, таму што па выніках спаборніцтваў хлопцы занялі выніковае першае агульнакаманднае месца. Цяпер пухаўчан вызначана будуць разглядаць на наступных стартах як фаварытаў.

- У нас у раёне ёсць цікавыя водныя маршруты, - кажа Сяргей Махнач. - І лёгкія - для пачаткоўцаў, і няпростыя, якія патрабуюць падрыхтоўкі — для вопытных. Таму мы можам развівацца і паказваць добрыя вынікі на падобных спаборніцтвах. Дарэчы, для іх правядзення Пухаўшчына — выдатнае месца. Зручнае і прыгожае. Упэўнены, што ўдзельнікі спаборніцтваў гэтага года правялі ў нас час з цікавасцю і карысцю.