Там сабралася больш за 500 юных музыкаў, танцораў, мастакоў з розных краін Усходняй і Заходняй Еўропы, каб прадэманстраваць сваё майстэрства. Хлопцы з Мар'інагорскай дзіцячай школы мастацтваў вярнуліся з багатай калекцыяй узнагарод. Паспяховым быў выступ харэаграфічнага ансамбля «Дубравушка»: яго малодшая група стала лаўрэатам II ступені, а старэйшая, прадставіўшы народны і сучасны танец, атрымала дыпломы I і II ступені. У намінацыі «Iнструментальная музыка» дыпломамі II ступені былі ўзнагароджаны юныя піяністы Марыя Матусевіч і Таццяна Брэль.
Вялікая каманда прадстаўляла на конкурсе мастацкае аддзяленне школы мастацтваў. У намінацыі «Кампазіцыя» з дзевяці ўдзельнікаў пяць сталі лаўрэатамі: Варвара Ануфрыева і Надзея Мартыненка атрымалі дыплом I ступені, Віялета Фіневіч — II-й, Ганна Драбышэўская — III ступені.
Папоўнілі скарбонкі сваіх узнагарод і юныя піяністы, якія прымалі ўдзел у міжнародным музычным конкурсе, які праходзіў у Балгарыі. З гэтай сонечнай краіны дыплом II ступені прывезла Марыя Грахоцкая і дыплом III ступені — Наталля Хомчык.
