- Яшчэ адно знакавае месца з'явілася ў нашым горадзе, - кажа старшыня раённай арганізацыі ГА «Беларускі саюз афіцэраў» Аляксандр Дашкевіч.- Я рады таму, што мы змаглі агульнымі намаганнямі ўвасобіць у жыццё першапачатковую ідэю аб увекавечанні памяці пра герояў 214-й паветрана-дэсантнай брыгады 4-га паветрана-дэсантнага корпуса, якія ўступілі ў сутычку з ворагам літаральна ў першыя дні вайны. Без падтрымкі танкаў, артылерыі, авіяцыі яны змагаліся з фашыстамі, застаючыся да канца вернымі вайсковай прысязе. Многія вайскоўцы пахаваныя ў брацкіх магілах на Пухаўшчыне.
Прапанову стварыць Алею славы падтрымала кіраўніцтва раённага выканаўчага камітэта. Для рэалізацыі праекта было абрана месца ў Новым Світанку побач з в/ч 89417.
- Хацелася, каб яно было даступнае для ўсіх гараджан і жыхароў раёна — адзначае Аляксандр Дашкевіч. - Каб магло стаць і месцам правядзення ваенна-патрыятычных мерапрыемстваў, і экскурсійным аб'ектам. Думаю, што ўсё так і атрымалася.
Будаўніцтва Алеі вайсковай славы аб'яднала многіх людзей. Раённая арганізацыя БСА звярнулася з лістом аб выдзяленні ваеннай тэхнікі да міністра абароны Андрэя Раўкова. У горад былі дастаўлены 100-міліметровая гармата МТ-12 «Рапіра», БТР-Д, БМД-1. Тэхніку захоўвалі і рэстаўравалі на ААТ «Пухавіцкі доследна-эксперыментальны завод». Акрамя таго, сваё месца на алеі занялі БМП-1 (памяць аб 30-й Іркуцка-Пінскай дывізіі), 122-міліметровая гаўбіца (была ўсталяваная на чыгуначным пераездзе ў Мар'інай Горцы ў памяць аб воінах 1-га Данскога танкавага корпуса), танк Т-80 (перададзены в/ч 89417).
Алея славы - гэта адзіная архітэктурная кампазіцыя, цэнтральнай кропкай якой з'яўляецца сталёвы парашут, усталяваны ў памяць аб подзвігу дэсантнікаў 214-й паветрана-дэсантнай брыгады, а таксама вайскоўцаў іншых вайсковых частак, якія дыслакаваліся на тэрыторыі Пухавіцкага гарнізона.
- Гэтую малую архітэктурную форму вырабілі на ААТ «Пухавіцкі доследна-эксперыментальны завод» (дырэктар Аляксандр Кончанка), — кажа камандзір брыгады Дзмітрый Кучук. - Вялікі дзякуй усім тым, хто падтрымаў нашу ідэю і наш праект: раённаму выканаўчаму камітэту, кіраўнікам прадпрыемстваў, членам ГА «Беларускі саюз афіцэраў», воінам-інтэрнацыяналістам, ветэранам, супрацоўнікам раённага аддзела ўнутраных спраў. Гэта ўклад у гісторыю нашага раёна, даніну памяці загінулым.
Побач з парашутам - мемарыяльныя знакі, на якіх увекавечаны імёны пухаўчан-Герояў Савецкага Саюза і назвы воінскіх часцей Пухавіцкага гарнізона.
Тэрыторыю комплексу добраўпарадкоўвалі агульнымі сіламі. Для Алеі славы на ААТ «Пухавіцкі доследна-эксперыментальны завод» спецыяльна былі вырабленыя лаўкі. Велізарны аб'ём працы таксама прарабілі камунальнікі УП «Жылцепласэрвіс» КХ, якім дапамагалі работнікі дарожна-будаўнічых арганізацый, раённага аддзела па надзвычайных сітуацыях, вайскоўцы 5-й асобнай брыгады спецыяльнага прызначэння, жыхары горада.
Вынік гэтай працы - бясцэнны падарунак гораду і гараджанам да 75-годдзя з дня вызвалення Беларусі ад нямецка-фашысцкіх захопнікаў.
