- У нас адпачывалі дзеці з прыёмных, апякунскіх і шматдзетных сем'яў, а таксама з дзіцячага дома сямейнага тыпу, - распавяла дырэктар лагера Юлія Кітаева. - Для арганізацыі іх адпачынку і аздараўлення праводзіліся самыя розныя мерапрыемствы. Прыязджалі да хлопцаў спецыялісты Цэнтра творчасці дзяцей і моладзі «Світанак», цікавыя развіваючыя фільмы прывозіў філіял КУП «Мінаблкінавідэапракат».
Таксама ў «Лясной казцы» прайшло прафілактычнае мерапрыемства, арганізаванае раённым аддзелам унутраных спраў. Яно накіравана на захаванне правілаў паводзін юнымі пешаходамі, на прафілактыку дзіцячага дарожна-транспартнага траўматызму.
Старшы інспектар ДПС АДАІ Уладзімір Цераховіч, звяртаючыся да хлопцаў, адзначыў, што ніколі нельга забываць аб правілах бяспечных паводзін на дарозе. Ён нагадаў, як пераходзіць праезную частку, і што катэгарычна рабіць не варта, каб не трапіць пад колы аўтамабіля ці ў іншую непрыемную сітуацыю.
Аб правілах бяспечнага адпачынку распавёў участковы інспектар інспекцыі па справах непаўналетніх Ігар Прадзільшчыкаў.
Супрацоўнікі аддзела ўнутраных спраў не толькі дазволілі хлопцам вывучыць спецаўтамабіль Дзяржаўтаінспекцыі, на якім прыехалі ў лагер, але і прывезлі спецсродкі абарончага, наступальнага характару, а таксама некаторыя ўзоры ўзбраення, якімі карыстаюцца пры выкананні сваіх службовых абавязкаў.
З цікавасцю юнакі разглядалі спецаўтамабіль. Садзіліся ў машыну, ўключалі светлавы гучнагаварыцель.
Каля навучальнай зброі таксама выстраілася чарга, прычым не толькі з хлапчукоў.
— Дзецям вельмі спадабалася гэта мерапрыемства, — адзначыў старшы інспектар па дазвольнай рабоце РАУС Валерый Клімовіч. - Спадзяюся, што яны будуць памятаць і выконваць правілы бяспечных паводзін.
Анастасія Плятнёва.
