- Мы ўпершыню правялі прыняцце прысягі ў адным месцы. Звычайна падобныя мерапрыемствы праходзілі па гарнізонах — распавёў камандуючы сіламі спецыяльных аперацый Узброеных Сіл Рэспублікі Беларусь Вадзім Дзенісенка. - У гэтым годзе было прынята рашэнне на базе в/ч 89417 праводзіць увесь цыкл пачатковай і агульнавайсковай падрыхтоўкі для моладзі.
Сказаныя на дарогу словы маладыя воіны пачулі ад камандзіра брыгады палкоўніка Дзмітрыя Кучука. Павіншавалі вайскоўцаў старшыня Пухавіцкага райвыканкама Віктар Каляда, ветэран Вялікай Айчыннай вайны, ганаровы салдат 6-й роты спецыяльнага прызначэння Генадзь Юшкевіч. Благачынны цэркваў 1-й Пухавіцкай акругі протаіерэй Аляксандр Цалкоў па традыцыі здзейсніў малебен. Начальнік Генеральнага штаба Узброеных Сіл - першы намеснік міністра абароны генерал-маёр Алег Белаконеў падкрэсліў, што маладыя людзі будуць праходзіць службу ў самым абсталяваным і баяздольным родзе Узброеных Сіл - Cілах спецыяльных аперацый, і падзякаваў бацькам за выхаванне годных абаронцаў нашай Радзімы.
Цырымонія прыняцця прысягі запомнілася не толькі маладым вайскоўцам. Для гасцей свята камандаванне вайсковай часці арганізавала выставу ўзбраення, тэхнікі і экіпіроўкі разведчыкаў. Запомніліся гледачам выступленні аркестра брыгады і паказальныя выступленні спецназаўцаў.
Аляксандр Вінніцкі з Мар'інай горкі - адзіны пухавец, які прыняў прысягу ў Мар'інай Горцы. Для Аляксандра гэта было асаблівае падзея, таму што яго бацькі служаць у в/ч 89417.
- Родныя казалі, што служыць побач з домам цяжэй. Але мне, наадварот, лягчэй усведамляць, што я знаходжуся ў сваім горадзе, - распавёў Аляксандр Вінніцкі. - І справа не толькі ў тым, што падчас звальнення я заўсёды магу пайсці дадому. Для мяне галоўнае, каб служба была цікавай і карыснай. Я хачу навучыцца арыентавацца на мясцовасці, скакаць з парашутам, хадзіць у разведку. Усе гэтыя навыкі змагу атрымаць у гэтай частцы.
Зараз у Аляксандра перыяд адаптацыі ў войску. Ён паступова прызвычайваецца да жыцця па Статуту, нарадах і калектыву.
- Прывыкнуць да новага месца заўсёды няпроста, але баяцца няма чаго. Я ведаю, што такое дысцыпліна, люблю чысціню і парадак. Трэба навучыцца рабіць усё трохі хутчэй — але гэта прыйдзе з часам, - працягвае суразмоўца.
Пасля прысягі Аляксандра сустракала вялікая і дружная сям'я. Бацькі з гонарам глядзелі на прыгожага і дарослага сына, пакуль малодшыя сёстры наперабой распавядалі брату, што падрыхтавалі для яго торт.
- На Сашы ляжыць пэўны груз адказнасці, таму што і мы з мужам служым у гэтай жа частцы. Упэўненая, ён будзе служыць годна. Галоўнае, каб ён заўсёды паводзіў сябе як сапраўдны мужчына, распавяла мама Наталля Вінніцкая.
Маладых людзей у блакітных берэтах у суботу можна было сустрэць па ўсім горадзе: яны атрымалі першае звальненне.
Кацярына Вернiкоўская.