Нарыхтоўку пачалі з закладкі ў сянажныя траншэі азімай свірэпіцы і азімага жыта. Гэтыя культуры паспелі першымі. Іх заклалі ў сянажную траншэю на ферме «Дудзічы-1», дзе ўтрымліваецца 1100 галоў буйной рагатай жывёлы. А ўсяго ў сельгасарганізацыі пяць малочнатаварных ферм, і дзве, у якіх знаходзіцца маладняк на дарашчванні і адкорме. Каля ферм размешчана 21 сянажная траншэя.
- Цяпер мы заканчваем закладваць сянажную траншэю каля фермы «Дудзічы-2», - распавядае галоўны аграном ААТ «Агра-абярэг» Раіса Есімчык. - Гэта ўжо шостая запоўненая траншэя. Сюды закладваем бабова-злаковую сумесь: канюшыну, люцэрну.
За якасцю корманарыхтоўкі пастаянна сочыць ветэрынарная служба гаспадаркі. Трамбоўка правяленай масы вядзецца кругласутачна. Адначасова на сянажнай траншэі працуюць Аляксандр Хадыка на ТО-332 і Сяргей Бельскі на К-700.
Прыбіраюць у ААТ «Агра-Абярэг» травы першага і другога года.
- Сёлета парадавала люцэрна — адзначае Раіса Дзмітрыеўна, - дае да 200 цэнтнераў з гектара, таксама добрыя канюшыны. Атрымліваем такі ўкос не выпадкова: увесну вырабілі падкормку карбанiтам і касам, як таго патрабуе тэхналогія.
У полі працуе 13 адзінак тэхнікі. Дзве касілкі ў дзень скошваюць да 90 гектараў. Здрабняе зялёную масу на КВК-800 Фёдар Хадыка. На яго рахунку ўжо больш за 5 тысяч тон. Калі дазваляе надвор'е, у дзень ён можа здрабніць да 400 тон зялёнай масы. Вынік залежыць яшчэ ад вільготнасці і ўраджайнасці. Адвозіць зялёнку Уладзімір Хадыка на МТЗ-1523.
Працуюць на адным полі Мікалай Паўлоўскі на камбайне «Ягуар», Мікалай Ляпешка і Іосіф Вільтоўскі на касілках КПР-9, а зялёную масу ў валкі зграбае на МТЗ-920 Алег Галавасты. На адвозцы занятыя Уладзімір Гінько, Дзяніс Кавальчук, Уладзімір Асіпук.
Каб не было перабояў у працы, абеды і падвячорак дастаўляюць механізатарам у поле.
У сельгасарганізацыі застаецца закласці яшчэ дзве траншэі з першага ўкосу. На раніцу пятніцы ўбрана больш за тысячу гектараў траў, нарыхтавана 5145 тон зялёнай масы.
На чарзе - аднагадовыя травы. Яны пасеяны на плошчы 250 гектараў.
Анастасія Плятнёва.
