Гэтая ўстанова адукацыі стала пераможцам конкурсу. Блужскія школьнікі вельмі адказна падышлі да ўдзелу ў конкурсе: хлопцы правялі збор макулатуры, намалявалі ўлёткі пра каштоўнасць лесу і ў форме флэш-мобу раздалі іх жыхарам вёскі. Наведалі з экскурсіяй мясцовае лясніцтва, падчас якой даведаліся шмат новага і цікавага аб лясных культурах, абароне лесу, барацьбе з яго шкоднікамі. У рамках акцыі «Тыдзень лесу» старанна папрацавалі на пасадцы лясных культур, а відэаролік аб іх удзеле ў конкурсе пакарыў журы сваёй маштабнасцю і арыгінальнасцю.
У якасці прыза за перамогу ў конкурсе школа атрымала турыстычны тэнт, каляровы прынтар, прыналежнасці для аргтэхнікі і канцылярскія тавары на суму 500 рублёў, а таксама пазнавальную літаратуру аб лясах Беларусі. Нагадваць пра важнасць беражлівых адносін да лесу будуць і чатыры туі, якія лясгас перадаў школе для ўпрыгожвання школьнага двара.