У красавіку ў гаспадарцы выйшлі на пашы чатыры дойныя статкі, у кожным з якіх у сярэднім 180 галоў. Пашы былі загадзя падрыхтаваныя: падкормленыя азотнымі і калійнымі ўгнаеннямі, своечасова падкошаны. Перад пачаткам пашавага перыяду ў гаспадарцы набылі новую касілку. Механізатар Максім Мацвіенка ўжо апрабаваў яе ў працы.
Культурныя пашы ў сельгаспрадпрыемстве займаюць плошчу 180 гектараў. Яны даюць па 58 цэнтнераў з гектара зялёнай масы. На адну галаву прыходзіцца 50 сотак.
Выпасается жывёла франтальным метадам. Для паўнавартаснага рацыёну на пашы знаходзіцца вада, соль у разліку 70 грам на карову і ў вольным доступе мінеральная дабаўка.
— Ужо прыкметна выраслі надоі. Калі раней сярэдні надой складаў 13,4 літра малака на ўмоўную галаву, цяпер жа - 14,5 літра — распавядае намеснік дырэктара жывёлагадоўлі СУП «Дукора-Агра» Арцём Гардзейчык. — Пашы ў нас шматкампанентныя: 3 адсотка складае канюшына лугавая, па 15 — белая канюшына і цімафееўка, 25% — райграс пашавы, а таксама мятлiк лугавы.
- Перад выхадам на пашы мы апрацавалі буйную рагатую жывёлу супраць кляшча, гнюса і такіх захворванняў, як целязiос. Яны могуць быць згубныя для жывёл — распавёў галоўны вет-урач сельгаспрадпрыемства Віктар Мандрусенка. — Акрамя таго, за месяц да пасьбы лекар-артапед Віталь Бараноўскі зрабіў абрэзку капытоў у кароў.
За кожным статкам замацаваны два пастухі. Паклапаціліся ў гаспадарцы і аб умовах працы для іх: выдадзена спецвопратка, у полі дастаўляюць абеды, ёсць вагончыкі, дзе можна схавацца ад непагадзі. Ад адказнага выканання працы пастуха напрамую залежыць колькасць атрыманай прадукцыі.
- Зялёная маса - слабаструктурны корм — адзначае Арцём Аляксеевіч, - таму падчас ранішняй і вячэрняй дойкі жывёл падкормліваем. На кармавым стале — сянаж і сілас, а таксама канцэнтраты.
Калі начная тэмпература паветра не будзе апускацца ніжэй за плюс дзесяць градусаў, у гаспадарцы плануюць арганізаваць кругласутачную пашчу.
Анастасія Плятнёва.