«ІЖ», «ЯВА», «ЯМАХА», «Мінск» - байкеры прыехалі на матацыклах самых розных марак. Цімафей Белы з Дружнага катаецца на матацыкле з дзяцінства. Амаль сем гадоў таму змяніў «Мінск» на больш магутную «Яву».
Мiнчук Алег Мазанік ў Мар'іну Горку прыехаў на канікулы. У моташоу ўдзельнічае другі раз.
- Мне падабаецца, што тут не так шмат байкераў, як у сталіцы, таму ўсё праходзіць больш згуртавана — распавядае Алег. - З нецярпеннем чакаю, калі паедзем калонай па вуліцах горада. Гэта, дарэчы, мой першы матацыкл «Мiнск Лідэр». Я купіў яго год таму.
На матацыкле гэтай жа маркі на моташоу прыехаў і Мікіта Пастухоў. Асновы кіравання Мікіта асвойваў на мапедзе, пачынаў у 13 гадоў. Затым перасеў на стары матацыкл, а месяц таму купіў матацыкл 2015 года выпуску. Пра сваё захапленне матацыкламі і пра жыццё мотааматара Мікіта распавядае ў сваім блогу ў Інтэрнэце. На яго блог падпісаныя каля тысячы чалавек.
Моташоу стала сапраўды агульнагарадскім святам. Арганізатары, у ліку якіх РК ГА «БРСМ», АДАІ РАУС, Пухавіцкая РОС ДТСААФ і аддзел ідэалагічнай работы, культуры і па справах моладзі райвыканкама, паклапаціліся пра тое, каб усе змаглі з цікавасцю правесці час. Для дзяцей працавалі атракцыёны, батуты, надзіманая горка. Старэйшыя хлопцы актыўна ўдзельнічалі ў конкурсе малюнкаў. Лепшыя мастакі атрымалі прызы ад спонсараў СТАА «Чароўны востраў» і ААТ «Машхарчпрад».
Вядучы моташоу Максім Губанаў праводзіў з байкерамі розныя конкурсы, дзе трэба было дэманстраваць навыкі кіравання. На моташоу вызначылі і самага моцнага байкера. Пераможца здолеў падняць аўтамабільны матор каля 30 разоў.
Са сцэны палымянымі песнямі гледачоў забаўлялі юныя артысты Рудзенскага СДК і музыканты інструментальнай групы МГАТК пад кіраўніцтвам Дзмітрыя Сарычава. Тэматычную пляцоўку падрыхтавала каманда работнікаў сяброўскага СДК.
Затым арганізаванай калонай байкеры праехалі па вуліцах горада ў бок аграгарадка Пухавічы. Па традыцыі ўдзельнікі моташоу ўсклалі кветкі да помніка Любы Гайдучонак і героям Вялікай Айчыннай вайны ў Блоні і Пухавічах.
Яшчэ адна асаблівасць моташоу - магчымасць падчас мерапрыемства ў РОС ДТСААФ здаць экзамен на катэгорыю «А» і «АМ».
Выдатным завяршэннем свята стаў фестываль «Холі фарбы».
