Сёлета на конкурс было пададзена каля 300 заявак. У пятніцу прайшла ўрачыстая цырымонія ўзнагароджання пераможцаў і лаўрэатаў.
Сімвал конкурсу - «Залатая Літара» - па традыцыі ўручаецца ў розных намінацыях лепшым друкаваным выданням рэспублікі. Наша газета ўжо пяць разоў станавілася лаўрэатам конкурсу. А сёлета ў намінацыі «Лепшыя матэрыялы сацыяльна-эканамічнай тэматыкі» мы сталі пераможцамі.
Дыплом і «Залатую Літару» галоўнаму рэдактару газеты Вользе Савастюк ўручыла намеснік старшыні Савета Рэспублікі Нацыянальнага сходу Рэспублікі Беларусь Марыяна Шчоткіна.
- Мы ішлі да гэтай перамогі не адзін год, марылі аб тым, каб статуэтка «Залатая Літара» папоўніла скарбонку нашых узнагарод. І вось наша мара здзейснілася, — сказала падчас уручэння ўзнагароды галоўны рэдактар газеты Вольга Савастюк. - Гэта прызнанне працы кожнага супрацоўніка рэдакцыі. І яшчэ нам асабліва прыемна атрымліваць гэтую ўзнагароду таму, што яе аўтарам з'яўляецца наш зямляк, скульптар Аляксандр Фінскі.
Дарагія чытачы! У гэтай перамозе ёсць і ваш уклад. Мы ўдзячныя Вам за супрацоўніцтва і спадзяемся, што яно будзе яшчэ доўгім і плённым.
Алена Максімава.
