Алея задумвалася, як месца дзе будуць сустракацца маладыя людзі, гуляць бацькі з дзецьмі, бабулі і дзядулі з унукамі. Для пасадкі арганізатары акцыі абралі клёны і рабіны, якія, на іх думку, сімвалізуюць мужчынскую грунтоўнасць і жаночую прыгажосць.
Пасадзіць дрэвы запрасілі прадстаўнікоў трох пакаленняў: ад моладзі ў акцыі прымалі ўдзел навучэнцы Мар'інагорскага аграрна-тэхнічнага каледжа, сярэдняе пакаленне прадстаўлялі педагогі устаноў адукацыі горада, работнікі культуры, жыллёва-камунальнай гаспадаркі, старэйшае — ветэраны вайны і працы.
Будуць расці на алеі і сямейныя дрэвы.
Іх пасадзілі пары, якія могуць быць прыкладам ўзаемнай павагі і адданасці для іншых. У акцыі ўзяла ўдзел маладая сям'я Наталлі і Валерыя Каваленка. Сваё дрэва пасадзілі ветэран Вялікай Айчыннай вайны Анатоль Пятровіч Скiталец і яго жонка Алена Ігнатаўна Корань, малалетняя вязніца фашызму. Маладая рабіна будзе сімвалізаваць сямейны саюз ветэранаў працы Віктара Вальдэмаравiча і Таісіі Афанасьеўны Вiярд.
Закладка алеі прайшла ў рамках трохбаковага пагаднення аб супрацоўніцтве, падпісанага раённым аб'яднаннем прафсаюзаў, раённым Саветам ветэранаў і раённым камітэтам ГА «БРСМ».
Наталля Пархомчык.