— На тэрыторыі Перажырскага сельсавета знаходзіцца 6 помнікаў загінуўшым землякам і 9 воінскіх пахаванняў, — расказала кіраўнік справамі сельвыканкама Марына Кашэўская. — За ўсімі помнікамі замацаваны адказныя арганізацыі. Іх спіс карэктуецца па меры неабходнасці. Напрыклад, сёлета ў ім адбыліся змены: за стан мемарыяла, усталяванага на месцы бою батарэі пад камандаваннем капітана Лявонцюка, будзе адказваць ААТ «Завод горнага воску».
Падчас правядзення раённага суботніка ўсе арганізацыі ўключылі ў план працы і добраўпарадкаванне замацаваных за імі помнікаў і воінскіх пахаванняў. Напрыклад, работнікі ТАА «Ліцейны двор» прывялі ў парадак тэрыторыю ля помніка загінулым землякам у вёсцы Вузляны. У мерапрыемстве прынялі ўдзел 12 чалавек і спецыялізаваная тэхніка прадпрыемства. Была праведзена ўборка тэрыторыі пасля зімовага перыяду, падрэзка дрэў і кустоў, вываз смецця. На прадпрыемстве інфармавалі, што ў бліжэйшы час будзе праведзены яшчэ шэраг работ па добраўпарадкаванні помніка: умацаванне бардзюрнага каменя цэнтральнай клумбы, рамонт прыступак пастамента, лакальны рамонт і афарбоўка фігуры салдата, афарбоўка прыступак і пастамента помніка, афарбоўка выбітых на пастаменце надпісаў, частковая замена агароджы помніка. Увесь пералічаны аб'ём работ прадпрыемства плануе выканаць да 25 красавіка.
У вёсцы Караваева ля помніка загінулым землякам парадак наводзілі работнікі сельсавета, ПУП «Волмер» на чале з кіраўніком Вольгай Ганчарэнка, работнікі лясгаса. Была прыбраная сухая расліннасць, высечаны стары хмызняк. У бліжэйшы час помнік будзе пафарбаваны. Гэты клопат узяў на сябе ПУП «Волмер».
Да цяперашняга часу рэйдавыя групы пабывалі ва ўсіх месцах, дзе знаходзяцца помнікі загінулым землякам і воінскія пахаванні. Вызначана, у якім аб'ёме неабходны касметычны рамонт. Выкананы ён будзе ў бліжэйшы час.
Згодна з дзеючым заканадаўствам, на ўсіх помніках і воінскіх пахаваннях павінны быць устаноўлены дзяржаўныя знакі пэўнага ўзору. Было вырашана іх абнавіць. Сельскі выканаўчы камітэт замовіў выраб новых знакаў. Яны ўжо атрыманы і ў бліжэйшы час будуць устаноўлены.
Запісала Наталля Васільева.
