У дзень рэспубліканскага суботніка міністр інфармацыі Рэспублікі Беларусь Аляксандр Карлюкевіч працаваў на сваёй малой радзіме ў Пухавіцкім раёне. Яшчэ зімой, падчас сустрэчы з калектывам ДЛГУ «Пухавіцкі лясгас», Аляксандр Мікалаевіч паабяцаў прыняць удзел у рэспубліканскай акцыі «Тыдзень лесу-2019». Сваё абяцанне міністр стрымаў.
Цэлы працоўны дэсант з ліку супрацоўнікаў Міністэрства інфармацыі высадзіўся ў Пухавіцкім лясніцтве. Разам з імі на пасадцы лесу працавалі старшыня Пухавіцкага райвыканкама Віктар Каляда і старшыня Пухавіцкага райсавета Аляксандр Прановіч, а таксама прадстаўнікі Рэспубліканскага дзяржаўна-грамадскага аб'яднання «Беларускае таварыства паляўнічых і рыбаловаў» і яго старшыня Юрый Шумскі. Юрый Іванавіч таксама працаваў на сваёй малой радзіме. Саджанцы хвоі і бярозы былі высаджаны на плошчы 2 гектары.
Дырэктар ДЛГУ «Пухавіцкі лясгас» Аляксандр Ракіцкі падзякаваў удзельнікам акцыі за працу і ўручыў падзяку калектыву Міністэрства інфармацыі Рэспублікі Беларусь і РДГА «Беларускае таварыства паляўнічых і рыбаловаў».
Вольга Лугавая.