У ДЛГУ «Пухавіцкі лясгас» у рамках гэтай акцыі запланавана пасадзіць лясныя культуры на плошчы 70 тысяч гектараў. Прыгатавана каля 350 тысяч саджанцаў.
У першы дзень гэтай акцыі ў Пухавіцкім раёне ўзялі ўдзел больш за 135 чалавек, якія прыехалі ў ДЛГУ «Пухавіцкі лясгас» з Мар'інай горкі і Мiнска. З іх дапамогай новы лес быў пасаджаны на плошчы 6 гектараў і зроблены дадатак лясных культур да пасадак мінулых гадоў на плошчы больш гектара.
На аўтобусе з Мiнска прыехаў у Рудзенскае лясніцтва атрад работнікаў кіруючай кампаніі холдынгу арганізацый дрэваапрацоўчай прамысловасці «BORWOOD» УП «БР-Кансалт» - больш за 30 чалавек. Многія ўзялі з сабой на пасадку новага лесу сваіх дзяцей.
Актывісты раённай арганізацыі ГА «Беларускі саюз афіцэраў», як і летась, узялі ўдзел у пасадцы саджанцаў у дадатак лясных культур у Пухавіцкім лясніцтве.
У Амельнянскім лясніцтве старт акцыі «Тыдзень лесу-2019» дала зборная каманда, у склад якой увайшлі актывісты раённага аб'яднання прафсаюзаў, раённай арганізацыі ГА «Беларускі рэспубліканскі саюз моладзі», супрацоўнікі аддзела ідэалагічнай работы, культуры і па справах моладзі раённага выканаўчага камітэта - усяго 30 чалавек. Прычым для некаторых гэта стала сямейным справай: жаданне пасадзіць новы лес выказалі і жонкі, і дзеці.
Працавалі валанцёры разам з работнікамі Амельнянскага лясніцтва, якія вельмі сур'ёзна падрыхтаваліся да прыезду гасцей: распрацавалі інструктаж па тэхніцы бяспекі, забяспечылі кожнага рабочымі пальчаткамі, падвезлі дастатковую колькасць пасадачнага матэрыялу.
Праца вялася на ўчастку плошчай 4,8 гектара. На дзялянцы па пэўнай схеме былі высаджаны саджанцы хвоі і бярозы: восем шэрагаў іглічных і два шэрагу лісцяных дрэў. Як патлумачыла ляснічы Амельнянскага лясніцтва Алена Гасцілавіч, такая схема пасадкі маладога лесу была распрацавана спецыяльна для гэтага ўчастка з улікам асаблівасцяў глебы і іншых важных фактараў.
Усе ўдзельнікі акцыі працавалі з задавальненнем. Праца на лясной дзялянцы перапынілася толькі на некалькі хвілін, калі на сустрэчу з валанцёрамі прыехалі галоўны ляснічы Пухавіцкага лясгаса Сяргей Кузняцоў і намеснік дырэктара па ідэалагічнай працы Вольга Камароўская. Яны ўручылі падзякі раённаму аб'яднанню прафсаюзаў, раённаму камітэту ГА «БРСМ» і аддзела ідэалагічнай работы, культуры і па справах моладзі раённага выканаўчага камітэта за ўдзел у акцыі «Тыдзень лесу—2019», падзякавалі ўсім валанцёрам за працу.
Месца ў Амельнянскім лясніцтве, дзе працавалі валанцёры, будзе прыкметным. Яго пазначылі спецыяльнай таблічкай, на якой адзначана, што малады лес на гэтай дзялянцы быў высаджаны падчас «Тыдня лесу—2019».
Дарэчы, пасадкай лясных культур, пачынаючы з сакавіка, штодня займаюцца ўсе лясніцтвы раёна. Да гэтай працы прыцягнута каля 100 работнікаў лясгаса.
Ужо больш за 270 чалавек заявілі ў лясгас пра сваё жаданне прыняць удзел у пасадцы новага лесу ў завяршальны дзень «Тыдня лесу» - 20 красавіка.
Прыём заявак на ўдзел у гэтай акцыі працягваецца. Заяўкі прымаюцца ва ўсіх лясніцтвах раёна, а таксама па тэлефонах: 4-53-49, (8-029) 871-55-64, (8-029) 371-55-64.
Усе ўдзельнікі будуць забяспечаны неабходным інвентаром і пасадачным матэрыялам. Для самых актыўных падрыхтаваны фірмовыя сувеніры.
Андрэй Мазанік.
Наталля Пархомчык.