Гэта ўжо дзявяты конкурс (неафіцыйна званы школьным Еўрабачаннем), таму многія ўдзельнікі адчуваюць сябе на яго сцэнічнай пляцоўцы ўсё больш упэўнена. А хтосьці, як навучэнка гімназіі Анастасія Коласава, ужо мае ў сваёй скарбонцы і перамогі, і прызавыя месцы.
Чым сёлета здзівілі і парадавалі ўдзельнікі? Перш за ўсё, прыемна, што ў іх спісе з'явіліся новыя імёны: запрашэнне гімназістаў прынялі навучэнцы сярэдняй школы №2 горада Асіповічы. І Марыя Драбудзька з песняй «Feeling good» вельмі спадабалася гледачам, якія падтрымлівалі дэбютантку не толькі апладысментамі, але і ўласным бэк-вакалам.
Дарэчы, падпявалі гледачы многім удзельнікам, таму што песні знаёмыя: па ўмовах сёлетняга конкурсу гэта былі песні з кінафільмаў.
Сярод конкурсных кампазіцый дзве былі прадстаўлены на нямецкай мове. Трэба аддаць належнае выканаўцам - гімназісту Багдану Дзмітруку і вучням Голацкага вучэбна-педагагічнага комплексу дзіцячы сад-сярэдняя школа Лявону Рудэнка і Анастасіі Верашчака — гітара) - за тое, што яны пастараліся знайсці ўдалыя саўндтрэкі на нямецкай мове і выканаць іх на высокім узроўні, паказаўшы не толькі вакальныя дадзеныя, але і добрыя моўныя навыкі.
Член журы Рэйчыл Пятровіч, ужо не ўпершыню прысутная на гэтым конкурсе, адзначыла, што ў гэтым годзе менавіта моўны прагрэс асабліва прыкметны, што не можа не радаваць.
А пастаянны старшыня журы - намеснік дырэктара Мар'інагорскай школы мастацтваў Наталля Захарчук - пахваліла ўдзельнікаў за старанне, за смеласць у выбары музычных кампазіцый і велізарнае жаданне якасна пражыць песню на сцэне.
Сёлета гэта зрабілі дзевяць выканаўцаў. За права стаць лепшым змагаліся таксама Арына Шляжко (СШ №3 горада Мар'іна Горка), Кацярына Верамейчык (Пухавіцкая СШ), Надзея Гурская і Любоў Рамановіч (Перажырская СШ), Наталля Голуб (Праўдзiнская СШ) і Віялета Шастакова (СШ №2 горада Мар'іна Горка).
Усе парадавалі гледачоў сваімі выступамі, але пераможцам журы назвала Віялета Шастакову і кампазіцыю «Crazy in love» з кінафільма «Пяцьдзесят адценняў шэрага». Цікава, што Віялета такім чынам стала пераможцай конкурсу другі раз запар: летась яна зрабіла гэта, будучы вучаніцай СШ №3 горада Мар'іна Горка. Цяпер жа яна прынесла першую перамогу ў конкурсе сваёй новай школе, вучні якой (не магу не адзначыць) ніколі не змянялі «Schoolvision Song Contest» і заўсёды вельмі сур'ёзна і адказна падыходзілі да падрыхтоўкі, а таму адрозніваліся добрымі і якасна зробленымі нумарамі. Так што шчаслівыя, думаю, былі і сама Віялета, і ўся яе група падтрымкі. Перамога стала узнагародай за упартасць і працу.
Хацелася б адзначыць найлепшую за гiсторыю арганізацыю конкурсу. Чыста тэхнічна ўсё было адпрацавана на вышэйшым узроўні.
— Мы імкнуліся зрабіць усё магчымае, каб конкурс прайшоў на адным дыханні, — кажа яго арганізатар, настаўнік англійскай мовы Мар'інагорскай гімназіі Алена Паплыка.— Улічылі вопыт мінулых гадоў і прыдумалі што-то новае. Рады, што ўдалося наблізіць сцэнар да таго, што мы бачым на сапраўдным Еўрабачанні, і арганізаваць інтэрактыўнае галасаванне гледачоў з дапамогай сацсетак і месенджараў.
Трэба, дарэчы, адзначыць, што большасць гледачоў аддалі свае галасы вучаніцы СШ № 3 горада Мар'іна Горка Арыне Шляжко і песні Flashlight.
Што засталося за кадрам? Максімум станоўчых ацэнак і дзяцей, і дарослых. Хоць, напэўна, былі і тыя, хто крыху засмуціўся. Так здараецца на любым конкурсе. Таму мне хацелася б адзначыць тыя школы, якія паказалі, што адсутнасць перамогi не можа стаць прычынай для будучага няўдзелу. Педагогі павінны вучыць дзяцей быць моцнымі і мэтанакіраванымі нават тады, калі нешта адразу не атрымліваецца па аб'ектыўных або суб'ектыўных прычынах.
Па выніках конкурсу былі агучаны планы на юбілейны (дзясяты) «Schoolvision Song Contest-2020». Па словах дырэктара Мар'інагорскай гімназіі Сяргея Зінкевіча, гасцей раёна сярод удзельнікаў будзе больш. І, ён спадзяецца, што, у першую чаргу, праявяць вялікую зацікаўленасць нашы ўстановы адукацыі.
А яшчэ, гаворачы аб гэтым унікальным нават для рэспублікі праекце, настаўнікі выказалі цікавую ідэю: чаму б кожнай гарадской школе не стварыць нейкі адзін праект, удзельнічаць у якім маглі б прадстаўнікі ўсіх астатніх школ. Калі гімназія ўзялася папулярызаваць замежныя мовы, то, да прыкладу, чаму Мар'інагорскі КПК дзіцячы сад-СШ як установа адукацыі з навучаннем на беларускай мове не можа папулярызаваць родную мову? Гэта мог бы быць фестываль беларускай песні ці беларускія чытанні, напрыклад. А СШ №2 горада Мар'іна Горка магла б збіраць у сябе самадзейныя тэатральныя калектывы. Не палічыце гэта за настойлівую рэкамендацыю. Але чаму, уласна, і не?..
Алена ШАНТЫКА.