У ААТ “Аграсімвал” палявыя работы актыўна вядуцца каля вёскі Гарэлец. Глебы там пясчаныя, на палях ужо суха. На закрыцці вільгаці працуюць Анатоль Лабанок і Павел Валасевіч, на ворыве — Аляксандр Кікот.
— Сёлета да гэтых відаў работ прыступілі на дзён дзесяць раней, чым летась. Верагодна, і сяўбу пачнем раней, калі надвор’е не ўмяшаецца ў нашы планы, — расказвае галоўны аграном сельгаспрадпрыемства Марыя Цымановіч. — Тэхніку загадзя падрыхтавалі. Спадзяюся, тэхнічных замінак не будзе.
Пакуль працоўны дзень у механізатараў пачынацца ў восем гадзін раніцы і доўжыцца да сямі гадзін вечара. Але гэты графік часовы. У масавы сезон сяўбы ён павялічыцца.
Сеяць яравыя культуры ў гаспадарцы плануюць на наступным тыдні. Яравы клін у 850 гектараў будзе засяваць Павел Валасевіч. Маладому механізатару не прывыкаць аднаму спраўляцца з пасяўной плошчай. Аднак пры неабходнасці да яго далучыцца Анатоль Лабанок.
Сяўба ў гаспадарцы пачнецца з 50-ці гектараў аўса на гарэлецкіх землях. Таксама ў планах земляробаў пасеяць 100 гектараў зернебабовых культур, 350 гектараў пшаніцы і столькі ж ячменю.
Кацярына ВЕРНІКОЎСКАЯ.
