Хлопцам добра знаёма творчасць Валерыя Квілорыя, а героі яго гумарыстычных апавяданняў даўно сталі для іх любімымі. Цікавы пісьменнік і выдатны апавядальнік у адной асобе - Валерый Тамазавіч спецыяльна прыехаў на сустрэчу з Мінска, і ўжо з першых хвілін свайго выступу завалодаў увагай хлопцаў. У кнігах пісьменніка шмат эксцэнтрычных сюжэтаў, рэальных, але ў той жа час смешных настолькі, што яны наўрад ці змогуць адбыцца ў жыцці. Многія з яго кніг напісаныя ў стылі фантастыкі, аднак, як сцвярджае Валерый Квілорыя, аснова іх - рэальныя падзеі, якія ён запазычыў, вывучаючы неапазнаныя з'явы і гісторыю. Кожны твор аўтара - гэта не проста фантастычная або гумарыстычная гісторыя, яна абавязкова нясе ў сабе выхаваўчы элемент.
Не перагружаючы дзяцей фактамі з біяграфіі, ён адразу ж перайшоў да аповяду вясёлых гісторый, яны ў яго на любы густ: спецыяльна для дзяўчынак, для хлапчукоў і для ўсіх. Ёсць «антывампірныя», для задзір, капрыз і спрачальнікаў. Валерый Квілорыя таксама пазнаёміў дзяцей з кнігамі дзіцячых аўтараў, якія ён выдае. З задавальненнем адказаў на пытанні залы.