Аўташкола — гэта першае, з чым асацыюецца праца раённай арганізацыйнай структуры ДТСААФ. Штогод падрыхтоўку ў ёй праходзяць сотні навучэнцаў: хтосьці з іх упершыню садзіцца за руль, хтосьці асвойвае больш складаныя катэгорыі.
— У мінулым годзе падрыхтоўку і перападрыхтоўку ў нас прайшлі 342 чалавекі, — распавёў старшыня РАС ДТСААФ Юрый Ішуцінаў. — Мы навучылі 182 вадзіцеля катэгорыі «В». Астатнія праходзілі перападрыхтоўку на катэгорыю «С», «Д», «Е». Прычым сярод тых, хто праходзіць у нас навучанне, не толькі пухаўчане, але і жыхары Старадарожскага, Асіповіцкага раёнаў і горада Мінска.
З навучэнцамі працуюць вопытныя спецыялісты. У нашым калектыве сем чалавек працуе больш за пяць гадоў, пяць — больш за дзесяць. У ліку найбольш вопытных выкладчыкаў і майстроў па ваджэнню, якіх у нашым раёне многія ведаюць і паважаюць, Барыс Нікалайчык, Міхаіл Клешчык, Масхуд Юсупаў. Хоць трэба адзначыць, што ўсе нашы супрацоўнікі добрасумленна выконваюць сваю працу.
Для навучання вадзіцеляў у РАС ДТСААФ створана добрая база. Як адзначыў Юрый Уладзіміравіч, самай старой машыне, на якой асвойваюць асновы кіравання навучэнцы, 6 гадоў. Парк абнавілі ў апошнія гады. І пра такую з'яву, як адмена заняткаў па прычыне тэхнічнай няспраўнасці аўтамабіляў, тут даўно забыліся. Дарэчы, у мінулым годзе зрабілі капітальны рамонт назіральнай ямы: якаснае абслугоўванне аўтамабіляў таксама напрамую звязана з якасным навучаннем.
А цяпер прыйшла чарга камп'ютэрнага класа. У пачатку гэтага года раённая структура атрымала пяць новых кампутараў. Зараз на іх усталююць ліцэнзійныя навучальныя праграмы, якія арганізацыя набыла на ўласныя сродкі, і пачнуць выкарыстоўваць падчас заняткаў.
ДТСААФ — гэта не толькі падрыхтоўка кіроўцаў. Арганізацыя праводзіць сур'ёзную ідэалагічную і спартыўную работу. У гэтым плане наладжана супрацоўніцтва з кіраваннем па адукацыі, спорту і турызму райвыканкама, аддзелам ДАІ РАУС, вайсковай часцю 89417, раённымі арганізацыямі ГА «Беларускі саюз афіцэраў», «Беларускі саюз ветэранаў вайны ў Афганістане», «Беларускі рэспубліканскі саюз моладзі». За мінулы год арганізацыя прыняла ўдзел у 36 сумесных мерапрыемствах.
Нямала было і спаборніцтваў. У РАС ДТСААФ працуе мотасекцыя, якой ужо 10 гадоў кіруе Ігар Жабко. Са стралкамі 17 гадоў займаецца трэнер Анатоль Нялюб. Іх выхаванцы ўжо на працягу многіх гадоў займаюць прызавыя месцы на спаборніцтвах абласнога і рэспубліканскага ўзроўню. Пацверджанне гэтаму — вялікая колькасць разнастайных кубкаў і грамат ў кабінеце кіраўніка.
Раённая арганізацыйная структура ДТСААФ імкнецца трымаць высокую планку. Па выніках 2017 года ёй удалося выйсці на другое месца ў вобласці. Вынікі 2018 года будуць падведзены ў бліжэйшы час.
Наталля Пархомчык.
