Старшыня раённага Савета дэпутатаў Аляксандр Прановіч, старшыня райвыканкама Віктар Каляда, ганаровы салдат 6-й роты спецыяльнага прызначэння Генадзь Юшкевіч.
Пачалося мерапрыемства з урачыстай часткі. Камандзір вайсковай часці 89417 Дзмітрый Кучук заахвоціў лепшых афіцэраў. Цырымонію ўзнагароджання правялі таксама старшыня райвыканкама Віктар Каляда і старшыня раённага Савета дэпутатаў Аляксандр Прановіч. Віктар Міхайлавіч у сваім выступе адзначыў значнасць свята, якое яшчэ раз дэманструе пераемнасць пакаленняў воінаў, гатовых у любую хвіліну стаць на абарону Радзімы.
З эфектных выбухаў і залпавай стральбы пачалося першае паказальнае выступленне спецназа - дыверсійныя дзеянні ў тыле ворага. Умоўныя бандыты былі ліквідаваныя. Трэба адзначыць, што баявы эпізод атрымаўся вельмі каларытным і яркім. Гледачы быццам ўбачылі кадр з кінафільма.
Воіны-спецназаўцы прадэманстравалі навыкі рукапашнага бою, у чарговы раз здзівіўшы сваім майстэрствам. Затым увага гледачоў была прыкавана да старых казарм. Паводле легенды, будынак адной з іх захапілі тэрарысты. Іх патрабаванні - пяць мільёнаў еўра, верталёт з пілотам і вызваленне палонных. Тэрарысты захапілі закладнікаў, але дзякуючы альпінісцкім навыкам спецназаўцаў іх удалося выратаваць. У баявой аперацыі былі задзейнічаны два браневіка, карэта хуткай дапамогі і машына МНС. Выглядала ўсё вельмі рэалістычна.
Пасля баявых эпізодаў асабліва шматлюдна было каля намётаў, дзе частавалі салдацкай кашай і гарачай гарбатай.
- Прыемна, што арганізатары паклапаціліся пра гледачоў - адзначае жыхар Мар'інай Горкі Аляксандр Сачышын. - Я сам калісьці служыў у брыгадзе, мой зяць - афіцэр, таксама тут служыць. Радуе, што кожны раз спецназаўцы паказваюць нешта новае. Раней альпінісцкая падрыхтоўка так не практыкавалася. Цікава было назіраць за зладжанымі і сінхроннымі дзеяннямі вайскоўцаў.
Сям'я Касабуцкіх на свята ў Мар'іну Горку прыехала з Мінска. Галава сям'і Павел да нядаўняга часу служыў у в/ч 89417. Калі даведаўся, што ў райцэнтры будзе святочная праграма, вырашыў прыехаць менавіта сюды.
- З вашым горадам звязаны добрыя ўспаміны. У брыгадзе ў нас быў згуртаваны калектыў, многіх таварышаў сустрэў сёння - кажа Павел Касабуцкі. - У мяне падрастае сын. Хачу, каб ён ведаў як мага больш аб нашай арміі і таксама служыў у гэтай частцы.
Усе, з кім давялося пагутарыць у суботу, адзначалі добрую арганізацыю свята. Для самых маленькіх пухаўчан працавалі атракцыёны. Тыя, хто старэй, аблюбавалі выставу ваеннай тэхнікі. Можна было не толькі сфатаграфавацца каля аўтамабіляў, але і пасядзець за рулём любой машыны.
Побач разгарнулася выстава ўзбраення. Аўтамат Калашнікава, снайперскія вінтоўкі, пісталеты і кулямёты, — усё гэта дазвалялі патрымаць у руках.
У парку было арганізавана некалькі інтэрактыўных зон. Гледачы актыўна падтрымлівалі каманды вайскоўцаў, якія ўдзельнічалі ў традыцыйных «кірмашовых» забавах: біліся падушкамі, перацягвалі канат, беглі эстафету па трое ў адных лыжах. На сцэне ў гэты час працягваўся святочны канцэрт, недалёка працавалі гандлёвыя палаткі.
* * *
У гэты ж дзень адбылося традыцыйнае ўскладанне вянкоў і кветак да Мемарыяла воінам 8-й гвардзейскай танкавай дывізіі. Члены працоўных калектываў таксама ўсклалі кветкі да абеліска Славы ў гонар воінаў, якія загінулі падчас Вялікай Айчыннай вайны, і помніка Любе Гайдучонак.
У разгар мерапрыемства мароз саступіў месца яркаму сонцу. Свята пад адкрытым небам атрымалася. А для многіх пухаўчан ён стаў падставай для выдатнага сямейнага выхаднога.
Кацярына ВЕРНIКОЎСКАЯ.