Вакальнае мастацтва на конкурсе прадстаўляў узорны хор «Мара» (кіраўнік Іна Собаль, канцэртмайстар Наталля Дзмітрук). Калектыў выканаў твор «Глорыя» з кароткай імшы Леа Дэліба і ў сваёй намінацыі заваяваў Гран-пры. Гэта стала падставай яшчэ раз падняцца на конкурсную сцэну, бо сярод уладальнікаў вышэйшай узнагароды ў розных намінацыях арганізатары конкурсу вырашылі разыграць Супер-гран-пры! У выніку яго ўладальнікам стаў узорны хор «Мара» Мар'інагорскай дзіцячай школы мастацтваў. Акрамя кубка, пераможцам уручылі яшчэ і грашовы прыз. Як прызналася кіраўніца калектыву Іна Собаль, такой узнагароды ў іх скарбонцы яшчэ не было!
Паспяховым стаў конкурс і для музыкантаў. Выхаванцы Наталлі Дзмітрук юныя піяністы Наталля Хомчык і Меланія Гархоцкая заваявалі дыпломы лаўрэатаў I і II ступені адпаведна. Вучань Наталлі Захарчук Сяргей Разанаў стаў лаўрэатам II ступені. Узнагароды такой жа годнасці атрымалі вучні Святланы Лось баяністы Раман Камароўскі і Ілля Журык.
Наталля Пархомчык.
