- У цяперашні час самую вялікую заклапочанасць выклікаюць аматары падлёднай лоўлі рыбы - кажа старшыня раённай арганізацыі АСВОД Уладзімір Асіпенак. - Жаданне правесці час у лункі і злавіць рыбу любой цаной бывае мацней здаровага сэнсу. Сёлета цёплы люты, і лёд на вадаёмах хутка губляе сваю трываласць. Устаноўлена, што пры тэмпературы паветра роўнай 0 градусаў, якая захоўваецца на працягу трох дзён, трываласць лёду змяншаецца прыкладна на 25 адсоткаў. Гэта значыць, што з кожным днём падледная рыбалка становіцца ўсё больш рызыкоўным спосабам правядзення вольнага часу. І ёсць неабходнасць нагадаць асноўныя правілы бяспекі.

Кожнаму рыбаку, які збіраецца выйсці на лёд, яшчэ з берага варта намеціць свой маршрут і вызначыць трываласць лёду. Гэта можна зрабіць візуальна: лёд празрысты блакітнага, зялёнага адцення — трывалы, а трываласць лёду белага колеру ў два разы менш. Лёд, які мае адценні шэрага, матава-белага або жоўтага колеру, з'яўляецца найбольш ненадзейным і можа абрынуцца без папераджальнага патрэсквання. Праверыць трываласць лёду можна пастукваючы палкай: калі пры ўдары пачынае праступаць вада, значыць, лёд нетрывалы, і выходзіць на яго нельга. Катэгарычна забараняецца правяраць трываласць лёду ўдарамі нагі. У выпадку з'яўлення тыповых прыкмет нетрываласці лёду (трэск, прагінанне, вада на паверхні лёду) неабходна неадкладна вярнуцца на бераг, пры гэтым ісці, шырока расстаўляючы ногі і не адрываючы іх ад паверхні лёду, а ў крайнім выпадку — паўзці.

На тонкім лёдзе рыбакам не рэкамендуецца збірацца групамі. І ні ў якім разе не выходзіць на лёд у стане алкагольнага ап'янення! Лункі неабходна свідраваць не бліжэй 5-6 метраў адзін ад аднаго.

Таму, хто ўсё ж праваліўся ў палонку, галоўны савет - не панікаваць. Трэба як мага хутчэй заняць гарызантальнае становішча, адкінуўшы ў бок усё, што было ў руках. Паспрабаваць легчы ўсім целам на лёд і адразу адкаціцца ў бок. На гэта ёсць долі секунды, і іх трэба абавязкова выкарыстоўваць. Гэта шанец на выратаванне!

Выбраўшыся з вады на лёд, не трэба спяшацца ўставаць на ногі — можна праваліцца зноў. Варта адпаўзці, шырока раскінуць рукі і ногі, або адкаціцца як мага далей ад палонкі. І паўзком дабрацца да берага.

Калі на вашых вачах чалавек праваліўся пад лёд, паспяшайцеся даць яму ведаць, што ідзяце на дапамогу. Набліжацца да пацярпелага трэба толькі паўзком, шырока раскінуўшы рукі. За 3-4 метра да пралому кінуць яму тое, што знойдзецца пад рукой: вяроўку, звязаныя разам шалік і рэмень, падаць дошку, шост. Асцярожна выцягнуць пацярпелага на лёд, і разам паўзком выбірацца з небяспечнай зоны ў той бок, адкуль прыйшлі.

Выходзячы на лёд, лішні раз падумайце, ці варта рызыкаваць жыццём і здароўем дзеля задавальнення.

Уладзімір АСІПЕНАК,

старшыня раённай арганізацыі АСВОД.