Асноўная ідэя ініцыятывы - стварэнне інклюзіўнай майстэрні «Скарбніца», дзе маладыя людзі з інваліднасцю, валанцёры (школьнікі), пажылыя людзі разам будуць вырабляць рэчы з другасных рэсурсаў. Маладыя людзі з інваліднасцю будуць навучаны швейнай справе, навучацца рамантаваць сваю вопратку, сфарміруюць швейныя навыкі для пашырэння магчымасцяў працаўладкавання і самазанятасці. Важнай з'яўляецца частка з публічнымі дасуговымі мерапрыемствамі для ўсіх жадаючых, дзе ўдзельнікі праекта змогуць узаемадзейнічаць у нязмушанай абстаноўцы, вучачыся пры гэтым талерантнасці.
Першае мерапрыемства ў рамках ініцыятывы - трэнінг «Я - валанцёр» - прайшло нядаўна на базе сярэдняй школы №3 горада Мар'іна Горка. Мэтай яго было развіццё лідэрскіх навыкаў ва ўдзельнікаў трэнінгу, якімі сталі маладыя людзі з інваліднасцю, навучэнцы школы, уцягванне іх у вырашэнне праблем грамадства шляхам папулярызацыі валанцёрскага руху. У якасці трэнера выступіла старшыня раённага валанцёрскага савета Наталля Хадыка.
На трэнінгу выкарыстоўваліся розныя формы: ролевыя гульні, праца ў групах, абмеркаванне відэаматэрыялаў. У канцы мерапрыемства яго ўдзельнікі змаглі даць вызначэнне, што такое валанцёрства, лідэрства, апісаць адрозненні паміж лідэрствам і кіраўніцтвам, раскрыць палажэнні асноўных тэорый, мэтаў, стыляў валанцёрства і лідэрства, назваць бар'еры на шляху да валанцёрства і лідэрства ў ім, метады іх пераадолення.
Хлопцы атрымалі новыя веды, у іх з'явілася цікавасць і жаданне ўдзельнічаць у праекце.
Людміла РЫЧКОВА,
старшыня РА ГА «Беларуская асацыяцыя дапамогі дзецям-інвалідам і маладым інвалідам».