Пад папулярную песню «Iдзе салдат па горадзе!» работнікі бібліятэкі віталі чытачоў-мужчын, якія з задавальненнем успаміналі моманты свайго салдацкага жыцця, пазіравалі перад фота-аб'ектывам. І яшчэ больш прыемна было даведацца, што гэты дзень адзначаюць і жанчыны-чытачкі, якія ў свой час былі ў шэрагах савецкай арміі. Святлана Трапкова 14 гадоў праслужыла ў Беларускім Штабе грамадзянскай абароны тэлефаністкай. Успамінала, якія напружаныя ў працы дні былі ў 1986 годзе ў сувязі з чарнобыльскімі падзеямі. Анатоль Скавыш служыў ва Уральскай вайсковай акрузе, атрымаў вайсковую спецыяльнасць танкіста і дэмабілізаваўся са службы ў званні старшыны, што было рэдкасцю - у асноўным гэта званне прысвойвалі тым, хто заставаўся на звыштэрміновую службу.
Віктар Панчанка ўспомніў сваю службу на палігоне Капусцін Яр у Астраханскай вобласці, даслужыўся да звання сяржанта. А Сяргей Скавыш памятае сваю службу па начных дазорах, трывогах і цікавай вучобе. Ён служыў на мяжы і за высокія паказчыкі ў баявой і палітычнай падрыхтоўцы з гонарам насіў пагоны старэйшага сяржанта.
У кожнага з іх багатая воінская біяграфія, а фота ў дэмбельскіх альбомах захоўваюць памятныя падзеі тых гадоў. Пажадаем мужчынам, каб больш не было нагоды браць у рукі зброю.
Е. Радкевіч, загадчыца бібліятэкай
