— Працу ў экалагічным напрамку мы пачалі ўжо больш за 10 гадоў таму з супрацоўніцтва з МГА «Экапартнерства», — распавядае Таццяна Іванаўна. — Спачатку мы вучыліся працэсу кампаставання, потым — па асобным зборы смецця. Жаданне ўвасабляць у жыццё атрыманую інфармацыю прыходзіла з разуменнем таго, што мы робім карысную справу. Кампост, напрыклад, мы выкарыстоўвалі і працягваем гэта рабіць для пасадкі кветак, угнаенні кветнікаў і градак на школьным участку. Пераканаліся, што вытворчасць кампоста дазволіла паменшыць колькасць смецця на школьнай тэрыторыі. А паасобна сабраныя макулатура, батарэйкі, пластык даюць нам магчымасць зарабіць, але, галоўнае, зрабіць свет чысцей і бяспечней. Гэта стала з часам добрай звычкай не толькі дзяцей, але і іх бацькоў. Мы даказалі, такім чынам, што добрыя звычкі можна і трэба фармаваць. Таму планы па здачы другаснай сыравіны, якія даводзяць школам, нас не палохаюць, а матывуюць да працы.
Стымулам для школьнікаў становяцца і конкурсы. У мінулым годзе, да прыкладу, пра навучэнцаў з гэтай школы даведаліся таму, што яны сабралі больш за ўсіх батарэек у вобласці.
Затым хлопцы вырашылі прыняць удзел у рэспубліканскім конкурсе па зборы макулатуры. Адразу, праўда, сумняваліся, што змогуць канкурыраваць, таму што літаральна напярэдадні атрымання ўмоў конкурсу здалі больш за 1,5 тоны макулатуры. Але вырашылі, што паспрабаваць варта. І агульнымі намаганнямі сабралі яшчэ 2140 кілаграмаў другаснай сыравіны. Асабістым рэкардсменам стала Дзіяна Чакаліна, якая здала 150 кілаграмаў макулатуры. Наогул самымі актыўнымі апынуліся другакласнікі — вучні Алы Фурс. Хлопцы прыносілі па 40-50 кілаграмаў непатрэбнай паперы.
У выніку школа заняла другое месца ў рэспубліцы сярод сельскіх школ.
— Поспех такой працы шмат у чым залежыць ад настаўнікаў, — кажа Таццяна Іванаўна Кавалёва. — Яны павінны не толькі данесці інфармацыю аб неабходнасці паасобнага збору адходаў, важнасці другаснай перапрацоўкі, але і сваім прыкладам паказаць, як гэта працуе на практыцы. У нашай школе паўсюль устаноўлены скрынкі для макулатуры, ёсць кантэйнер для збору батарэек, памяшканне для захоўвання пластыкавых адходаў. Другасную сыравіну прыносяць у школу не толькі дзеці, але і педагогі. І гэта самы лепшы прыклад.
Паспяховасць рэалізацыі экалагічнага напрамку ў выхаваўчай працы ў Ананіцкай школе абумоўлена яшчэ і тым, што адказвае за гэтыя пытанні вельмі зацікаўлены і актыўны чалавек — намеснік дырэктара па гаспадарчай частцы Жанна Стасенка. Яна сама даўно паасобна збірае адходы і сваім прыкладам матывуе навакольных рабіць гэта, не даючы гэтай працы стаць фармальнасцю. Жанна Цімафееўна ўпэўненая, што калі з самага дзяцінства сфармаваць правільныя звычкі, то і, пасталеўшы, школьнікі не будуць ім змяняць.
Алена ШАНТЫКА.