На базе нашага раёна прайшла нарада па падвядзенні вынікаў работы па аздараўленні і санаторна-курортным лячэнні насельніцтва Мінскай вобласці.

Вітаючы гасцей Пухаўшчыны, намеснік старшыні раённага выканаўчага камітэта Наталля Чарнышова адзначыла, што мы рады гасцям не толькі як добрыя гаспадары сваёй зямлі: выбар месца правядзення выніковай нарады ў Мар'інай Горцы гаворыць аб тым, што наша праца па аздараўленні насельніцтва прыкметная, а вопыт пухаўчан цікавы іншым. І гэты факт не можа не радаваць, таму што ў раёне сапраўды шмат робіцца для таго, каб, у прыватнасці, дзеці адпачывалі з карысцю для здароўя і развіваліся.

Для большай нагляднасці госці нашага раёна наведалі некалькі тэматычных пляцовак у Цэнтры творчасці дзяцей і моладзі «Світанак», дзе быў прадэманстраваны вопыт працы нашых землякоў. Прайшлі прэзентацыі намётавага лагера на базе лагера з кругласутачным знаходжаннем «Лясная казка», які ўжо 11 гадоў прышчапляе скаўцкія навыкі школьнікам, лагеры для інтэлектуалаў «Эрудыт» пры Мар'інагорскай гімназіі (дзеці адпачываюць і працуюць над разнастайнымі праектамі), лагеры «Гвардзеец» (працуе на базе СШ №3 Мар'іна Горка пры садзейнічанні ваеннаслужачых 5-й асобнай брыгады спецыяльнага прызначэння), а таксама тэматычных школьных лагераў (прадстаўлялі вучні Пухавіцкай і Дуброўскай СШ).

На тэматычнай пляцоўцы.

— Нарада пачалася на вельмі пазітыўнай ноце — адзначыла на пленарным пасяджэнні начальнік прадстаўніцтва Мінскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва Ірына Яўсеева. — Мы ўбачылі, што сродкі, якія выдзяляюцца дзяржавай на аздараўленне, выдаткаваныя не дарма. Для таго, каб дзіцячы адпачынак прайшоў з карысцю і цікава, пухаўчане рэалізуюць выдатныя ідэі, прыцягваючы да супрацоўніцтва вайсковую частку, РАНС, РАУС, спартыўную школу, цэнтр турызму дзяцей і моладзі. Многія ідэі камусьці, верагодна, здадуцца цікавымі.

На пленарным пасяджэнні былі заслуханыя справаздачы аб выніках працы прадстаўніцтва Мінскае абласное ўпраўленне Рэспубліканскага цэнтра па аздараўленні і санаторна-курортным лячэнні насельніцтва, а таксама аб выніках аздараўлення дзяцей у аздараўленчых лагерах за 2018 год. Ірына Яўсеева адзначыла, што сёння з'яўляецца прыярытэтным дзіцячае аздараўленне. Таму трэба прыкладаць максімум намаганняў для таго, каб запаўняльнасць лагераў была поўнай.

Валянціна Сяргеева, вядучы спецыяліст прадстаўніцтва Мінскае абласное ўпраўленне Рэспубліканскага цэнтра па аздараўленні і санаторна-курортным лячэнні насельніцтва, падвяла вынікі працы за 2018 год у нашым раёне. Было адзначана, што для пухаўчан такая праблема не варта: пуцёўкі ў аздараўленчыя лагеры карыстаюцца попытам. Таму ўсе планы па аздараўленні былі выкананы. У 37 аздараўленчых лагерах адпачылі 2605 дзяцей і падлеткаў. Калі ж казаць у цэлым, то, уключаючы санаторна-курортны адпачынак, аздараўленне атрымала 4430 пухаўчан (дзяцей і дарослых).

На нарадзе абмеркавалі актуальныя пытанні арганізацыі санаторна-курортнага лячэння і аздараўлення насельніцтва на бягучы год.

Традыцыйна прайшло ўзнагароджанне лепшых работнікаў прадстаўніцтва.

Алена Максімава.