— У халодную пару года гэта адна з самых частых прычын пажараў, — адзначае інспектар РАНС Андрэй Чакан па шляху ў прафілактычны рэйд у Блужскі сельсавет. — У лютым у Мінскай вобласці праходзіць месячнік пажарнай бяспекі. Наша задача яшчэ раз нагадаць людзям, што іх бяспека і жыццё — у іх руках.
Кіроўца РI «Энерганагляд», здаецца, вязе нас па добра знаёмых адрасах. У большасці вёсак яму можна не называць нумары дамоў: з прыпынкам не памыліцца, бо неаднаразова вазіў сюды прадстаўнікоў сваёй інспекцыі.
— Па першых двух адрасах нас накіраваў сацыяльна-педагагічны цэнтр. Сем'ям, у якіх выхоўваюцца непаўналетнія дзеці, пастаянна ўдзяляем асаблівую ўвагу — кажа інспектар «Энерганагляду» Аляксандр Фіневіч, які ў гэты раз адправіўся ў рэйд.
Першы прыпынак у вёсцы Залог Пяцігодкі. Ідзем у адну з кватэр. Нас сустракае гаспадыня, якая жыве разам з мужам і трохгадовай дачкой. Дзяўчынка знаходзіцца ў сацыяльна небяспечным становішчы (суправаджаецца), таму сям'я і апынулася ў спісе ў інспектараў. Але любая праверка лішняй не будзе, тым больш што дом ужо не новы. Сям'я жыве тут чацвёрты год, кватэра належыць ААТ «Суцінскі».
Інспектар РАНС адключыў электрапрыборы і праверыў коркі. Жучкоў не аказалася.
- У нас было такое парушэнне, калі толькі пераехалі ў кватэру. «Сюрпрыз» застаўся ад ранейшых гаспадароў. Самі такіх парушэнняў не дапускаем — патлумачыла гаспадыня.
Андрэй Чэкан праверыў стан печы. Ён звярнуў увагу на адсутнасць прытопачнага ліста і адступкі. Заўвагі жанчына паабяцала ліквідаваць.
Дарослыя ў гэтай сям'і — аматары пакурыць у верандзе.
— Попел стрэсваем толькі ў попельніцу — удакладніла жанчына.
— Гэта правільна. Але веранда - таксама частка дома — нагадаў інспектар РАНС. — У вас дома дзіця, ды і побач людзі жывуць. Падумайце аб сваёй бяспецы.
Цацкі ў двары аднаго з дамоў у вёсцы Суцін казалі аб тым, што тут жывуць дзеці. Але дзіцячы смех мама не чула ўжо месяц. Хлопчык і дзяўчынка, 2011 і 2013 гадоў нараджэння, знаходзяцца ў сацыяльным прытулку ў Дуброўцы. Дзяцей забралі туды ўжо другі раз.
— Думаю, што ў сакавіку дзеці будуць са мной, — кажа Вікторыя. — Пачалі з мужам рабіць рамонт. Дом ужо стары. Разумеем, што ёсць заўвагі, будзем выпраўляць.
У доме дзве печкі, адна не працуе. На той, якая абагравае практычна ўвесь дом, ёсць расколіна. Гаспадар запэўніў, што ўжо замачыў гліну і заладзіць расколіну ў бліжэйшы час.
Віктар Панкратовіч жыве ў вёсцы Арэшкавічы разам з састарэлай маці і дарослым сынам. Нядаўна назіральная камісія ўжо прыязджала да яго з праверкай. Без парушэнняў не абышлося: у печкавай дзверцы не было ручкі, у калідоры навісалі аголеныя правады.
— На ліквідацыю гэтых парушэнняў мне далі месяц. Усе ліквідую, хіба камусьці хочацца згарэць? — кажа гаспадар дома. — У вёсцы тынкоўкі не купіш, трэба ехаць у горад. З працай не заўсёды атрымоўваецца выехаць, таму працэс ідзе не так хутка, як бы хацелася. Але ў прызначаны тэрмін усё будзе выпраўлена.
Стукаем у дзверы аднаго з дамоў у вёсцы Берлеж. Пачуўшы «адкрыта», заходзім. Гаспадыня дома чатыры месяцы таму пашкодзіла нагу, таму сама адчыніць дзверы не змагла. У доме беспарадак, каля ложка — пустыя бутэлькі.
— Часам выпіваю, але не палю, — кажа гаспадыня.
Аляксандр Фіневіч праверыў стан электраправодкі. У гэтым доме, як і ў папярэдніх, Электраправодка старога ўзору, выкладзеная ромбам. Рэкамендацыі спецыяліста — зрабіць рамонт электраправодкі і правесці электрафізічныя вымярэннi жылога дома.
Андрэй Чэкан ў гэты раз рэкамендацыямі не абышоўся. Гэтая печ дэманструе ўсе грубыя парушэнні (глядзіце здымак). Інспектар РАНС склаў пратакол.
З усімі парушэннямі жанчына пагадзілася. Абяцала заняцца рамонтам печы, як толькі здароўе дазволіць стаць на ногі.
Пакуль удзельнікі рэйдавай групы рабілі сваю працу, у дом прыйшоў сужыцель гаспадыні. Мужчына прынёс бутэльку віна, якую пачаў распіваць проста перад інспектарамі. Спачатку ён быў даволі гаваркі, але паступова стаў блытаць словы, сеў на лаўку і заснуў. Горкая ўзяла сваё. Звесткі пра мужчыну інспектары перададуць у міліцыю.
Кацярына ВЕРНIКОЎСКАЯ.