Сёлета 15 лютага для воінаў-інтэрнацыяналістаў юбілейная дата: 30 гадоў таму апошнія савецкія войскі пакінулі Афганістан.
Урачыстыя мерапрыемствы ў Мар'інай Горцы сёлета прайшлі напярэдадні памятнай даты. Месцам сустрэчы для воінаў-інтэрнацыяналістаў стала вайсковая частка 89417. Ля мемарыяла ў гонар загінуўшых воінаў-спецназаўцаў 334-га атрада спецыяльнага прызначэння прайшоў мітынг. У ім прыняло ўдзел кіраўніцтва раёна, камандаванне брыгады, моладзь, прадстаўнікі грамадскіх арганізацый і, вядома, воіны-інтэрнацыяналісты. Многія з іх спыняліся ля сцяны мемарыяла і ўчытваліся ў iмёны таварышаў, якія назаўжды засталіся маладымі…
Благачынны 1-га Пухавіцкага благачыння протаіерэй Аляксандр Цалкоў здзейсніў малітву за ўсіх воінаў, якія загінулі пры выкананні інтэрнацыянальнага доўгу. Іх памяць ушанавалі хвілінай маўчання.
Працягнулася мерапрыемства ў ваенным клубе "Гвардзеец". Старшыня Пухавіцкага райвыканкама Віктар Каляда ў сваім выступе адзначыў, што памяць аб усіх загінулых у той вайне жывая. За духоўна-маральнае выхаванне маладога пакалення і ў сувязі з 30-годдзем вываду савецкіх войскаў з Афганістана Віктар Міхайлавіч уручыў падзякі Аляксандру Баешку, Аляксандру Багдзюкевічу, Аляксандру Кузняцову, Мікалаю Філіпаву.
Ветэранаў вайны ўзнагародзілі таксама камандзір вайсковай часткі Дзмітрый Кучук і старшыня раённай арганізацыі "Беларускі саюз афіцэраў" Аляксандр Дашкевіч.
На сцэну ў той дзень падымаліся ўсе воіны-інтэрнацыяналісты. Ваенны камісар Максім Уласаў і старшыня раённай арганізацыі ГА "Беларускі саюз ветэранаў вайны ў Афганістане" Віктар Болдыраў уручалі юбілейныя медалі "30 гадоў вываду савецкіх войскаў з Афганістана". Тыя, хто не змог прысутнічаць у зале "Гвардзейца", абавязкова атрымаюць свае ўзнагароды.
Пад гучныя апладысменты залы такую ж юбілейную медаль Максім Уласаў уручыў бібліятэкару вайсковай часткі Людміле Галубенка за асабісты ўклад у патрыятычнае выхаванне моладзі. Без сумнення, экскурсіі Людмілы Вiленаўны ніколі не пакідаюць абыякавымі.
Музей быў адкрыты і ў гэты дзень. Генадзь Шэршань і Аляксандр Крывіцкі знайшлі сябе на шматлікіх здымках. Мужчыны сябруюць з 1989 года.
- Роўна 30 гадоў таму, 14 лютага 1989 года, я выходзіў з Афганістана, - кажа Аляксандр Крывіцкі. - Прайшоў ад Кушкі да Кандагара. Пасля вяртання застаўся служыць у брыгадзе.
Генадзь Шэршань служыў у Асадабадзе ў 334-м атрадзе спецыяльнага прызначэння і быў сярод тых, хто першым выходзіў з Афганістана.
- Заўсёды цікава пытацца, але распавядаць нашмат цяжэй. Разумееце, што на вайне здаралася ўсякае. Цяжка ўспамінаць, калі таварышы гінулі, і ты не мог дапамагчы, - кажа Генадзь Шэршань. — Успаміны і сёння бударажаць сэрца. Упэўнены, некалькі скупых слёз сёння прамовілі ўсе мае таварышы.
Завяршылася мерапрыемства тэматычнай канцэртнай праграмай. Фінальную песню "Віват, шураві!", якая лічыцца неафіцыйным гімнам той вайны, воіны-афганцы выконвалі ўсёй залай.
Кацярына ВЕРНIКОЎСКАЯ.
