— Калектыў работнікаў раёна цеплавых сетак ЦЭЦ-5 дастаткова прафесійны і добра абсталяваны тэхнічна для таго, каб аператыўна рэагаваць на любую аварыйную сітуацыю, — кажа начальнік раёна цеплавых сетак Васіль Малаковіч. — Гэта наш абавязак. Але нам, вядома, прыемна, калі людзі заўважаюць тое, што мы робім, і дзякуюць за працу.
Асноўная задача нашага калектыву — эксплуатацыя і рамонт цепласетак і гарачага водазабеспячэння для таго, каб ацяпляльны сезон для жыхароў абслугоўваемага рэгіёну праходзіў без праблем. Працы ў нас у гэтай сувязі нямала: на балансе прадпрыемства — 131 кіламетр цеплатрас. Асноўная іх частка была перададзена нам для абслугоўвання УП "Жылцепласэрвіс" КХ некалькі гадоў таму. За гэты час персаналам РТС былі прыведзены ў парадак найбольш праблемныя ўчасткі.
У 2017 годзе былі замененыя магістральныя цепласеткі. Летась замянілі на ПI і ГПІ трубы сеткі двух жылых комплексаў у пасёлку Дружны. Гэта больш за 4000 метраў цеплатрас.
Таксама летась энергетыкамі было адрамантавана 9 цэнтральных цеплавых пунктаў у Дружным і Свіслачы, заменена цепласетка да бальніцы ў гарадскім пасёлку Свіслач.
— Праблемных участкаў, дзе могуць узнікаць аварыйныя сітуацыі, усё яшчэ нямала — адзначае Васіль Малаковіч. — Але мы гатовыя ў любы момант выехаць на іх ліквідацыю. РТС забяспечаны неабходным рамонтным абсталяваннем, кадрамі і спецтэхнікай. У планах 2019 года — замена квартальных цепласетак у гарадскім пасёлку Свіслач.
На ўзбраенні энергетыкаў ёсць брыгадны аўтамабіль, які абсталяваны абсалютна ўсім неабходным для ліквідацыі аварый на цеплатрасах.
— У аўтамабілі маецца сістэма асвятлення для працы ў цёмны час сутак, сістэма жыццезабеспячэння рабочых (умовы, каб адпачыць, сагрэцца, прыняць ежу), — распавядае Васіль Дземідовіч. — Такой тэхнікі ў раёне больш няма. Таму мы аказваем пры неабходнасці дапамогу і іншым арганізацыям. Так здарылася, напрыклад, некалькі гадоў таму падчас сур'ёзнай аварыі на сетках у пасёлку Праўдзінскім, калі там склалася сапраўды складаная сітуацыя. Дзякуючы добраму аснашчэнню і, вядома, нашым спецыялістам, мы ў стане працаваць не толькі хутка, але і якасна.
Алена ШАНТЫКА.
